Mipui harsatna turin sawrkarin chhiah khawn a tum lo a, dan awmsa hnuaia tha taka chhiah pek erawh khua leh tui tha te awmdan tur a ni tih deputy chief minister Tawnluia chuan a sawi.
Ningania Khawzawla Deputy Commissioner of State Tax office a hawnnaah he thu hi deputy chief minister chuan a sawi a. Mizoram sawrkar chuan mahni kutkawih ngeia intodelh tumin, hemi kawnga mumal zawka inrelbawlna kalpui nan Resource Mobilization Department thar a din tih a sawi a ni.
Taxation chu sawrkar tana sum laluttu department pawimawh tak a nih angin, sawrkar pawhin a ngaipawimawh a. Sawrkar kum liamta 2022- 2023 chhungin cheng vaibelchhe 1020 chhiah a lakhawm thei chu ropui a tih thu a sawi. Office hawn thar tak chu Khawzawl district fuke kim zelna kawnga thil pawimawh tak tur a ni tiin, district mipuiin sawrkar an rinna kaltlanga an thawhchhuah a ni tih a sawi.
Taxation department hi 1988 May 20 khan Excise department atangin a indang a. Tunah commissioner of State Tax hnuaiah Zone 14 – Aizawlah zone 4 leh district dang 10 ah zone khat theuh deputy commissioner kaihhruainain an awm a. Kumin chhungin Mamit leh Siahaah deputy commissioner office leh staff quarters hawn a ni a, Lungleiah office leh quarters sak mek a ni.
Taxation department hian GST, VAT, GST huam loh petroleum tax leh profession tax lakhawmin, tunhnaia kum nga chhunga sawrkarin chhiah khawn tur a bituk (target) chu a khum vek.
Kum 5 kalta chhunga sum hmuh
(vaibelchhia in)
Kum Bituk Hmuh zat
2018-19 483 578
2019-20 573 667
2020-21 661 677
2021-22 768 894
2022-23 971 1020
2023-24 (upto August) 492