Mizoram State Public Grievance Redressal & Monitoring System thar ‘Mipui Aw’ chu Zirtawpni khan chief minister Lalduhoma’m a tlangzarh a, a kaihhruai sawrkar chu mipui aw ngaithla turin a inpeih reng tih a sawi.
“Mipui sawrkar, langtlang sawrkar kan din theih nan mipui nen inpawhna tha tak neih a ngai a. Mipui ngaithla turin kan inpeih at reng a, keimahni duhna aia mipui duhna dah hmasak kan inhuam a ni. Chu chu mipui rorelna ram democracy innghahna pawimawh a ni a. Chumi hmanrua atana tangkai tak tur ‘Mipui Aw’ thar kan hawng thei hi a lawmawm a ni,” Lalduhoma hian a ti a. A buaipuitu DP&AR department leh a thawhpui Mizoram State e-governance Society chungah lawmthu a sawi.
He online portal hi a hmangtu mipui tan leh a lo chhangtu turte tan awlsamna a thlen ve ve dawn tih sawiin, portal hmanga zawhna leh dilna chu a changtu nodal department pawhin lo ngaipawimawh turin a chah. “Ram mipui rawngbawlna pawimawh tak a ni tih hre chungin kan kalpui dawn nia,” tiin mipui tana lo inhawng hle turin a viltu tur officer-te a chah a. Mipui pawhin tangkai takin hmang se a duh tih a sawi bawk.
DP&AR minister K Sapdanga sawi danin, Mipui Aw hi 2012 March 1 khan a version hmasa hman a ni tawh a, 2019 laihawl atang khan security thilah a him tak loh avangin hman zui a ni lo. Hun engemawchen an neih loh hnuin tuna chief minister hmalakna in a thar tha zawk an nei ta a ni.
Portal hi Sap tawng emaw Mizo tawng duh zawk zawka hman theih a ni a, a hman dan inzirtirna (tutorial) dah nghal a ni. Mipui Aw hi khua leh tuiten an harsatna, an vuivaina, an chanvo an zawhfiah theihna tur a ni a, www mipuiaw.mizoram.gov.in a luh tur a ni.
Mipui hman theihin ‘Mipui Aw’ siam
