Mipui hriselna endik sak
Lunglei district bawrhsap ruahmana RailTel Corporation of India Limited New Delhi atanga corporate social responsibility (CSR) sum hmuh kaltlangin ‘Healthy Lunglei District Campaign’ hnuaiah Lungsen Aspirational Block huam chhung khaw hrang hrangah inkai chhawn theih loh natna (non-communicable disease) chungchang inzirtir leh inentir runpui (NCD awareness & screening camp) kalpui mek a ni.
He hmalakna hi kumin May 9 atang khan tanin, Lunglei district Health & Family Welfare department-a doctor, nurse leh thawktuten khaw hrang hrangah kalchilhin thisen sang leh zunthlum an endik bakah a mamawhte hnenah a thlawnin damdawi an sem a ni.
Campaign hi May leh June thla chhung kalpui tura ruahman niin, thisensang leh zunthlum endik zat tur atan kum 30 chin chunglam mi 3000 aia tlem lo tinzawn a ni.
Lungsen Aspirational Block huamchhunga Healthy Lunglei District Campaign kalpui mekah hian khaw 6 – Lungsen, Zawlpui, New Vuakmual, Putlungasih, Kauchhuah leh Phairuangchhuah-ah health camp buatsaih tawhin, heng khaw 6 atang hian mi 141 hriselna dinhmun endik a ni tawh. Thisensang (hypertension) tih hriat chhuah thar 6 leh inhre sa endik nawn 39 awmin, zunthlum (diabetes mellitus) hriat chhuah thar 13 leh inhre sa endik nawn 16 an awm tawh.
Mipui hriselna endik sak
