Mipui leh sawrkar

Mipui sawrkarna democracy ramah chuan mipui an lal a, a chhan pawh sawrkar siamtu an nih vang a ni. Tun tumah pawh mipuiin kan aiawha rorel tur kan thlang leh mai a, kan thlan ten ro an rel that loh chuan, inthlan leh hunah mipui bawkin an thlak leh mai a, rorel tha nia mipuiin an hriat chuan inthlan hunah an thlang nawn leh mai a; chu chu mipui lal dan chu a ni.
Hetih lai hian, inthlana vote thlak chiah hi mipui hian kan hlutna emaw tia, inthlan a zawh tawh chuan ‘hlutna ka nei ta lo’ tih mai hi sawi chikah kan nei a. Hei hi fiamthu anga ngaih theih mah ni se, hlutna nei zui tawh lo ang hrima inngaihna hi kan nei zui tak tak em maw ni tih turin, sawrkar hi kan zu dah hla/hrang ta viau anga ngaih theihin thil a awm chawk thin.
Democracy ramah chuan engkim hi mipui atanga intan a ni. Mipui chu sawrkar siamtu a ni phawt a, mipui siam sawrkar chuan tihtur pakhat a nei a, chu chu mipui rawngbawl, mipui tana hnathawh a ni.
Aiawha thlanchhuah, ‘sawrkarna fawng vuantu’ kan tihte hian an hna hmasa ber chu a thlangtu mipuite hmasawnna leh ram himna ngaihtuaha chumi hna thawh chu a ni. Chutiang hna thawk tur chuan an inpe a, an intawktarh a, mipui rawngbawl an châk a, ram leh hnam hmasawnna hna thawh an duh a, mipui an ngen ngawih ngawih a, ‘hnathawk theia min siam chuan chumi khami chu kan ti ang…’ an ti lawm lawm a. Mipuiin an thlang ta a, tichuan ‘mipui sawrkar’ chu a lo ding ta a.
Sawrkar a lo din hian mipui lam hian ‘mipui siam sawrkar’ a ni tih hi kan theihnghilh zawk tlat ni te hian a hriat a, a chhan chu a thawktu mihringte kha emaw sawrkar kan ti ta thin a, a thlangtu mipui vin kat dawr dawr thei turah kan ngai a, kan hlau emaw, kan tlawn hial emaw te pawh a ni thei awm e. Thuneihna an neihte pawh hi anmahni thuneihna a ni lova, mipui pek a ni a. Mipuiin an thlan tawh loh hunah chuan office-a thuneihna ang kha an hmang zui zel thei tawh lo. Heta tang hian mipui thiltihtheihnaa thuam an nih avanga thunei leh zahawm mai an ni tih a chiang hle; an mimal zahawmna zuk dahhniam tumna ni lovin.
Mipui lam pawh hian, kan aiawha rorel tur leh hna thawk tura kan thlan chhuahte hi kan zah thiamin kan ngaihlu tur a ni a, a chhan chu mipui aiawh an nih vangin. Aiawh thlan chhuah ni ve lem lo, mipui hna thawk tura mipui sum hmanga rawih heng sawrkar hnathawk kan tihte pawh hi, anmahni department theuh hnuaiah chuan inthununna leh thuneihna an nei vek a, mahse rawng an bawlsak mipuite erawh an thunun tur a ni ve lem lo. Sawrkar hnathawkte hi sawrkar kutke ber, mipui rawngawltu, an hna thawh mekte pawh mipui vanga thawk an nih avangin, mipui hi an zah thiam a pawimawh hle a ni.