DP&AR (GG&TW) buatsaihin chief secretary kaihhruaiin sawrkar hnathawkten mipui tana tangkai zawk leh tha zawka hna an thawh theihnana ruahmanna hrang hrang sawihona – “State Consultative workshop on Institutionalizing Capacity Building: From Training to performance linked Governance” chu March 27 khan neih a ni a. Department hrang hrang leh Mizorama training institute thenkhat-a hotute an tel.
Thupui thlan bik – sawrkar hnathawkten an hna chanpual mila an mamawh tak training an neih theih dan tur, Mizorama training institution lian ber Administrative Training Institute leh insitution dang tih changtlun chungchang, mimal tin mamawh zirna tha pekna atana artificial intelligence leh technology dangte a tangkai thei ang bera hman leh, sawrkar hnathawkten an hna vawn lai mil tura training an lo neih tawh thin pawh tha zawk leh awlsam zawka tunlai thiamna mila thuamthat chungchang rel a ni.
Sawrkar laipui Department of Personnel & Training-a thehluh tur report duan dan, Sadhana Saptah (April 2-8 2026) hman huna department tin hmalak dan tur duan leh hemi chhunga iGOT Karmayogi course ruat sate zawhfel tur thute rel a ni bawk.
Rawtna langsar zual zingah – ATI kaihhruaina hnuaia district hrang hranga Centres of Excellence din, Capacity Building Plans (CBPs), iGOT leh HR system thlunzawmna hmunpui (integrated ecosystem) siam, AI hmanga zirna platform Mizo tawng ngeia hman theih tur siam leh, ATI Mizoram chu training leh thawhhona kawnga khaipa ber (apex institution) ni tura tih chak a tel a ni.
Workshop hi kumin May 15 & 16-a National Departmental Summit awm tur atana Mizoram sawrkar inbuatsaihna niin, Mission Karmayogi leh Viksit Bharat 2047 nen inmil tura state hmalakna herrem chu a thil tum pawimawh a ni a. Department hrang hrangin hun tiam chhunga an Department Capacity Building Plan theuh siam tura beiseina nen khar a ni.
Mipui tana tha zawka thawh theih dan tur sawrkar hnathawkten zir
