Kuthnathawktuten harsatna an tawh loh theih dan ang berin sawrkarin kuhva tawlhruk tihtawp tumin a buaipui mek tih Home minister K Sapdanga chuan a sawi.
Assembly Session-ah Serlui bialtu MLA Lalrinsanga Ralte chuan a bial chu kuhva ching tamna a ni a, kuhva tawlhruk nasat lutuk avanga kuhva hralh thei lo zingah an tel a, nikumah a hralhnaah buaina lutuk tawk lo mah se, kuminah an tawk tih a sawi. Kuhva chu a hma kum, a par atangin a leitu turten an hauh lawk a, an veng zui thin a. Kuminah erawh hnamdang rawn hauh lawk an awm loa, Bilkhawthlir Kuhva Chingtu Association mangang chuan dan loa kuhva tawlhruk nasa lutuk veng turin duty an tum ta hial tih a sawi a ni.
Sawrkarin hma a lakpui dan tur leh tun aia khauh lehzuala dan loa kuhva kalte a veng thei dawn em, tiin, tualchhung kuhva hralh theihna tur sawrkarin ruahmanna a siampui thei em tih a zawt a ni.
Home minister chuan dan lova kuhva tawlh hi a lang leh a ruk deuh pawhin sawrkarin a buaipui a, sawrkar ai mahin mipuiin an buaipui nasa lehzual a, a chep sawt hle tih a sawi a. Khawi khawiah chhekkhawl a awm nual niin a hriat a, engtik hun laia chhek khawl nge tih a hriat loh mah se, sawrkar thar pian hnu ah chuan police checkgate reng rengah ramdang kuhva a kaltlang tur a ni lo, tih thupek a awm a, chu chu police-te pawhin an zawm tha hle nia an hriat thu a sawi a ni.
“Duty lohna hmunah erawh kawng ruk a awm zung zung e, an ti a. Chu’ng avang chuan kuhva tawlh hi a rem hleithei loa, a veivak pawh a tawp hleithei lo. Police leh khawtlangin an lo man chang a awm a, foreign bungrua a nih miau avangin police-ten an kawl rei thei loa, buaipui tham ala awm reng niin a lang,” a ti.
Mizoramah kuhva chinga ei zawng chhungkaw sing khat chuang awm te nen remruat dan an ngaihtuah mek zel a. Kuthnathawktuten harsatna an tawh loh theih dan ang bera a remchang ang anga buaipui mek a ni, K Sapdanga hian a ti. “Ruling emaw oppostion a ni emaw, sawrkar hnathawk leh kuthnathawktute kan ni emaw, ramchhunga kan thlai thar tibuai thei thil a nih avangin a ram puma tang tlang turin ka sawm a ni,” a ti.
Mipui tawrh loh dan zawngin Kuhva tawlhruk tihtawp tum
