Mipui thlamuanpui tlaka nung turin police-te chah

Mipui thlamuanpui tlaka
nung turin police-te chah
Police department chu mipui venghim tur leh thlamuantu tur an nih angin, mipui thlamuanpui tlaka nun uluk a tul tih Home minister chuan a sawi.
Aizawla Police Conference 2025 neih kharna a hmanpuinaah Home minister K Sapdanga chuan mipui himna atan dan bawhchhia dap chhuah kawngah, dan phal loh bungraw tawlhruk man chhuah kawngah leh khawtlang ralmuang siamnan dan leh thupek kenkawh kawngah Mizoram Police hmalakna a thangmawi thin chu lawmawm a tih thu a sawi a. Thil thar zirna hun leh intuaihriamna hun tha neia Police Conference buatsaih a ni chu lawmawm a tih thu a sawi.
Police department chu mipui venghim tur leh thlamuantu tur an nih angin, mipui thlamuanpui tlaka nun uluk a pawimawh tih sawiin, ruihhlo laka fihlim tur leh taksa hriselna ngaipawimawh turin a chah. ‘Train to Excel’ tih thupui chawinung a, taksa sawizawi uar a, leh ei leh in uluk turin a chah bawk.
Thawktu indaih lohna leh department building tlabal leh thawmthat ngai engemawzat awm chu theih ang anga hma lak a ni, tiin, constable 295 lakna tur physical fitness test pawh tluang taka kalpui a ni a, exam la awm tur pawh dik leh langtlang taka buatsaih tum a ni tih Home minister hian a sawi.
Hna lak belh tum zel a nih rualin, tha taka mahni duty hlenchhuak theia a thawksate thiamna leh theihna tuihriam a pawimawh tih a sawi a. Thawk thei lo hlawh pek reng chu sawrkar phurrit a nih avangin mahni mawhphurhna hlenchhuak thei lo sawrkar hnathawk an awm leh awm loh zirchiang a, chutiang mi an awm a nih chuan Mizoram Special Voluntary Retirement Scheme 2024 emaw Periodical Review of Government Employees under Fundamental Rules 56 dan tlawhchhana chawlhtir an nih tur thu a sawi a ni.
Conference-ah hian Mizoram Police hnuaia Unit head – SP leh commandant bakah district tin atangin SDPO, battalion tin atangin asst. commandant pakhat theuh leh Unit tin atangin inspector pahnih theuh an tel a. Police Headquarters-a senior officer ho an tel bawk. Conference chhung hian thupui pawimawh tak tak zirho a ni a. Duty hlenchhuak tha te hnenah chawimawina thuziak hlan niin, Champhai SP Shivendhu Bhushan, deputy SP Dennis Vanlallura leh SDPO Gavit Gogna te pawh chawimawi an ni.