Mipuiin Congress chu ram leh mipui tana thawk tura ZPM aia tha zawka an pawm theihna turin tan lak a ngai tih Congress vice president Lalnunmawia Chuaungo chuan a sawi.
Zirtawpnia Congress Bhavan-a inkhawmah Lalnunmawia Chuaungo chuan, tunhma in Congress leh MNF chu duhthlan tur a ni mai a, party mal supporter-te vote ringawtin sawrkarna siam turin a tlin theih loh a, neutral awn lam lam a ni tih a sawi. “Mipuiin min rintawk turin hmachhawp neih a ngai a. Congress hi ram leh mipui tana thawk turin ZPM aiin a tha zawk, an tih turin tan lak a ngai,” a ti.
Assembly chhungah mai ni loin pawnlamah, nitin khawsak kawngah sawrkar khalhngiltu an ni dawn a. Congress party chu mahni inchhek arbawmna tur ni loin, ram leh hnam, mipui tana thawktu an ni a; ram rawngbawl kawngah tan an la zel dawn tih a sawi.
Ram leh mipui tana pawi tur sawrkarin a khawih a nih chuan mipui thlavang an hauh dawn tih MPCC vice president hian sawiin, “Sawrkar dinglai sawisel ngawr ngawr kan thlurbing dawn loa, ram leh mipui tana tha tur thilah, ram leh mipui pawikhawihna thilah chuan kan enliam mai mai dawn lo. Congress hi ram leh mipuiin harsatna hrang hrang an tawh atanga khaichhuak thei tura kan ngaih a ni. Sawrkar mekte policy theihtawpa tihhlawhtlin tir tura nawr tur kan ni,” a ti.
Mizote chu a tha lam zawnga kan kal vek chuan hmasawn zawnga tlan zawt zawt thei kan nia a hriat thu sawiin, a tifuh zawngin kal lawklawh ila chu theihna kan nei a. Hnam changkang leh state changkang tak kan nei thei nia a hriat thu a sawi bawk.
Mipuiin Congress an duh theihna tura tan lak a ngai – Lalnunmawia
