Mipuiin ram hruaitu tha zirchian a ngai – Lal Thanzara

Mipuiin politics kan ngaihven a, tute nge ram hruaitu tha tih kan zirchian a ngai tih Congress vice president Lal Thanzara chuan a sawi.
MPCC hruaitute chuan tunkar chhung hian Kolasib leh Serlui bial tlawhin Thawhtanni khan Vairengte khawlaiah street campaign an nei a, Thawhlehni khan Kolasib-ah Congress Worker Meet an hmanpui.
MPCC vice president Lal Thanzara chuan, kan ram kaihruaitu tur thlan chungchangah fimkhur tura mipui chahin, mi thenkhatin politics ngaihsak peih loa, an tel ve na chi ni loah ngai thin mah se, politics tha lo avanga tawrhna chu kan zavaia chungah a thleng thei tih a sawi. “Politics kalsual avangin kum 20 chhung kan ram a buai a, kan politics dik lo avangin ram economy a tlachhe mek a, a tuartute chu mipui tho kan ni. Chuvangin mipui hian politics ngaihven a, tute hi nge ram hruaitu tha tih hi kan zirchian a ngai,” a ti.
Centre lamah All India Congress Committee thlazar hnuaiah regional party hrang hrang inzawmkhawm chuan BJP sawrkarna titawp turin tan an la chho a, BJP do duh ho zawng a kuahkhawm mek tih Lal Thanzara hian a sawi a. Congress party chu nakum India ram inthlanpui neih turah an sawrkar ngei dawn, tiin, “Hnam hnuaihnung leh sakhaw tlem zawkte tan Congress party hi himna kulhpui a lo ni tawh thin a. Mitin leh sakhaw hrang hrangte intibuai loa zalen taka kan awm theihna turin a sawrkar leh ngei dawn. Mizoramah pawh kuthnathawktute leh miharsa zawkte tan Congress hi kan sawrkar leh a ngai a. Tang puihna hmanga miretheite khaichhuak tur leh a chhe lai siamthatu ni turin chunglamin min buatsaih mek a ni,” a ti.