African Swine Fever (ASF) hri a leng mek a, hun engemaw chen chu mipuiin vawksa an lei tha ngam lo tawh. Mahse mipuiin vawksa hi an thinhrik lo hret hret niin a lang a, hrilen tirh lam aiin vawksa hralh a awl ta deuh nia ngaih a ni.
Aizawla vawksa zuarte chuan vawksa hralh a nuam telh telh a, mipuiin vawksa an thinhrik lo hret hret tih an sawi a, amaherawhchu hrilen hma ang kha chu a la ni chuang lo a, hrilen tirh lam ang em em kha chu a ni tawh lo tih mai a ni an ti.
Aizawla bazar hlun pakhat Venghlui Bazar-a vawksa zuarte chuan ni khatah vawk pakhat hralh zawh chang an nei tawh a, hei hian inhralh a nuam telh telh tih a tilang, an ti.
AH&Vety department-in an chhinchhiah danin, kumina ASF vanga vawk thi hmasa ber chu February ni 9-a mi a ni a, April vel atangin hri hi a hluar. June vel thleng khan vawksa hralh a har a, tun hnaiah chuan a zia ta deuh tih chu a zuarte sawi dan a ni.
Venghlui Bazar-a vawksa zuarte chuan ni khata vawk pakhat hralh zawh chang an nei tawh a, Inrinni-ah phei chuan pakhat an hralh zo deuh zel tawh tih an sawi.
Vawk man a la tlawm a, a hmaa Rs 25000 vel man kha Rs 16000 man te a ni. Mahse a man tlawm hi a talhtute tan a hlawk chuang lo a, a hma anga inhralh a awl loh avangin, hralh zawh loh a awm thei.
Bazar-a vawksa zuar thinte chuan hrilengin a nghawng dan chi dang a awm thu an sawi a, veng chhunga talh an pung a, hri an hlauh avanga vawk talhte’n chhungkhat lainate leh hmelhriatte an bel a, hei vang hian bazar-a zuarte tan inhralh a har a, tunah pawh hetiang hi a la ni reng tih an sawi.
“Aizawl chhung chauh a ni lo, Aizawl atanga khaw hla deuh deuha mite pawhin hri an hlauh avangin an talh a, a Kg-in Aizawlah an thawn a, a then phei chuan Rs 300 te an ti a, chutianga lei tur a awm laia lo inhralh chu har lo chi a ni lo,” vawksa zuar pakhat chuan a ti.
Vawksa hi kg-ah Rs 400 a ni a, hrilen hnuah chu aia tlawma lei tur chu a awm thin.
Mipuiin vawksa thinhrik lo hret hret
