2024 People’s Choice Country Awards an sem turah Miranda Lambert chu Country Icon Award hlan a ni dawn tih an puang. He award hi September ni 26 hian Grand Ole Opry House, Nashville-ah an sem dawn a, Lambert hi country music khawvela kum 23 kalta atanga hniak lo nei tan tawh kha a ni a, award hi country music tana a thlawh hlawk avanga dawng tur a ni.
Nikum khan he award hi Toby Keith hnenah hlan a ni a, a award dawn atanga thla li hnuah pumpui cancer avangin a boral zui ta a ni. Award a dawn lai pawh hian damlo chau tak a ni sa tawh a, People’s Choice Country Awards an sem vawi khatnaa niin The Country Icon Award dawng hmasa ber a ni ta a ni.
NBC Universal Entertainment-a executive vice president Jen Neal chuan, “Kum 20 chuang country music tana theih tawp lo chhuah tawh, Miranda Lambert-i album te hian khawvel hmun hrang hranga fans thinlung a hnehin a phuar khawm a. A career hlawhtlinna baka he industry tana a ke pen tawhna te hi chawimawi nan Country Icon Award kan hlan thei tur hi keini pawh kan phur hle a ni,” a ti.
Lambert hi awards magnet a ni deuh ber mai a, Academy of Country Music Awards 35 a dawng tawh a, Country Music Association Awards pawh 14 dawng tawhin (hmeichhe zinga dawng hnem ber a la ni), Grammy Awards pawh pathum a dawng tawh.
Billboard chart-a pawh a mikhual lo le a, Hot Country Songs chart-a No.1 kai thei hla panga a nei tawh a, Country Airplay chart-a No.1 thei pasarih, Top Country Albums chart-a No.1 kai tei album pasarih nei tawhin, Billboard 200 (albums) chart-a No.1 kai thei album pakhat a nei taw bawk.
Rimai mai bakah Lambert hi restaurateur, sumdawng, lehkhabu ziaktu te a nih bakah nungcha te tana thawktu pawimawh tak niin, MuttNation Foundation dinin, he foundation kaltlang hian ran chuangtlai tam tak enkawlin, hetiang lama hman tur sum pawh dollar maktaduai 10 vel zet a tuak ngah thei nghe nghe a ni.
Miranda Lambert-i’n Country Icon Award dawng dawn
