Mizoram tluchhe mek tundinna tur leh economy chhe lutuk siamthat leh nan BJP chuan cheng nuai 5 hmanga bultan pui turin manifesto an buatsaih tih BJP State president Vanlalhmuaka chuan a sawi.
An party office-a inkhawmah thu sawiin Vanlalhmuaka chuan, miretheiten cheng nuai 5 hmang chuan bul an tan thei dawn tih sawiin, loneitute tan KCC loan kaltlangin a pung awm loa loan puk theihna a awm tih a sawi a. Loneitute chu kan ram dinchhuahna bulpui an nih avangin BJP chuan an ngaipawimawh thu leh ram economy siamthat nan an pawimawh avangin an hmalakna tur a nih thu a sawi.
Comprehensive Assistance & Rehabilitation of Economy (CARE) kaltlangin miretheite dinhmun tleu tawh khaichhuahna turin cheng nuai 5 an sem dawn tih sawi bawkin, “He scheme hian eizawnna eng chi pawh a huam vek dawn a. Ram nei sa tan an ram leilung mil ang zel thlai chin tur ruahmanpui an ni anga, ram neilote tan hmun remchang ruahman pui an ni ang. Mimal leh chhungkua, a huhoa enkawlin an mamawh kawng, eng leh tui sawrkarin a ngaihtuah sak dawn a ni,” a ti.
CARE scheme dawngtute chu inthlan zawh kum khat chungin first phase atan a tlem berah cheng nuai hnih pek an nih tur thu leh he scheme hnuaia an hmalakna an puitlin ang zelin tanpuina chu thlakhat chhungin a phase dawt leh thawhna tur pek belh zel an ni dawn tih BJP Mizoram hruaitu hian a sawi. CARE scheme chu hlawhtlinpui ngei ngei tur programme a nih avangin zawmthaw rilru pu mi tan inzehluh a remchang dawn lo tih a sawi.
Mirethei khaichhuah nan cheng nuai 5
