Miss Mizoram 2024- Jennifer Lalrinzuali Renthlei

Miss Mizoram 2024- Jennifer Lalrinzuali Renthlei

Miss Mizoram 2024 Grand Finale chu April ni 26 zan khan Sky City Hall, Saizahawla Arcade, Tanhril-ah neih a ni ta a, Jennifer Lalrinzuali Renthlei, Republic Hmar Veng chu Miss Mizoram a ni a, Evelyn Zachhingpuii, Saikhamakawn chu 1st Runner-Up (Pahnihna) niin, Rebecca Zothanpuii, Khawzawl chu 2nd Runner-Up (Pathumna) a ni a, Lalhmingsangi, Kolasib leh Lalrinhlui, Champhai te Top 5-ah an lang bawk.
Grand Finale-ah contestant ten Traditional Dress leh Evening Gown round te an neih hnuah Top 10 puan a ni a, Top 10-ah hian Jennifer Lalrinzuali Renthlei, Republic Hmar Veng; Evelyn Zachhingpuii, Saikhamakawn; Rebecca Zothanpuii, Khawzawl; Lalrinhlui, Champhai; Lalhmingsangi, Kolasib; H.Lalhriatpuii, Kanan Veng; Judith Lalramengmawii, ITI Veng; Lalsangkimi, Dinthar 1; T. Lalmuanpuii, Zemabawk North leh L Lalnuntluangi (Ruthi), Lawngtlai te an lang.
Top 10-te hian judge te zawhna chhangin, chumi hnuah Top 5 result puan a ni. Top 5 result siam nan hian Top 10-a zawhna an chhan dan ringawtah en a ni lo va, round hmasa lam an activity hrang hrang atanga point an khawl te nen belhkhawm a ni.
Top 5-ah Jennifer Lalrinzuali Renthlei, Evelyn Zachingpuii, Rebecca Zothanpuii, Lalrinhlui leh Lalhmingsangi te awmin, anni hian zawhna inang “Kan chhehvel (environment) humhalhah kan thangharhin i hria em? Environment chhe zel tur ven nana thil pawimawh i tih min hrilh thei em?” tih chu an chhang theuh ang. He common question zawh lai hian a chhang tur ni lo zawng chuan zawhna an hriat lâwk loh nan headphone vuah tir vek an ni a, an headphone-ah thil ri dang ngaihthlak tir an ni. Top 5 atang hian winner thlan a ni zui ta a ni.
Grande Finale hi Rini Hlondo-in a host a, judge inhmelhriattirna a bul tanin, Ruatpuii zai laiin Miss Mizoram contestant-te stage-ah inlan a, an lam rual a, chumi dawtah Mizo Dance Camp ten lam hmuhnawm tak an entir leh bawk.
Finalist 18-te traditional wear nen inlan lehin, chumi hnuah sub title pali- Miss Beautiful Skin, Miss Congeniality, People’s Choice leh Beauty With a Purpose (BWAP) te sem niin, Lilac a perfoem hnuah evening gown round awm lehin Top 10 result puan a ni a, question & answer round zawkah Top 5 result puangin, top 5 atangin winner an thlang leh ta a ni.

Miss Mizoram Sub titles latute:
Miss Congeniality – Jennifer Zothanzuali, Lunglei
Miss Beautiful Skin – Lalrinhlui, Champhai
Beauty with a purpose (BWAP) -R. Vanlalawmpuii, Serchhip
People’s Choice – Lalhmingsangi, Kolasib
Miss Talented – M. Lalrinchhani, Siaha
Miss Personality & Miss Body Beautiful -Evelyn Zachhingpuii, Saikhamakawn
Miss Active -Judith Lalramengmawii, ITI Veng
Miss Photogenic & Miss Ramp Walk -Jennifer Lalrinzuali Renthlei, Republic Veng

2024 Miss Mizoram Jennifer Lalrinzuali Renthlei, kum 23, hi feet 5 leh inches 9 a sang niin, 35-25-36 a ni a, nikum, 2023 khan Miss North East India-ah telin 2nd runner up a ni a, nikum July tla khan Miss North East Diva-ah a tel tawh bawk.
Jennifer-i hi 2020 Miss Mizoram Zirsangpuii’n crown a khum tir a, ‘Miss’ crown an khumtir laiin Jennifer-i hian chunglam a kawk zauh a, hei hi eng vanga tinge a nih tia kan zawhna chu, “Ka zinkawnga min hruaitu, hriselna leh finna thluak min petu Pathian hnenah lawmthu ka sawi a, ‘Ka lawm e Lalpa,’ ka ti a ni,” tiin a chhang.
Jennifer chuan Miss Mizoram-ah hian pakhatna nih tumin a tel niin a sawi a, “Pakhatna nih tuma tel ka ni a, mahse, pakhatna kan nih leh nih loh turah chuan za-ah za chuan ka chiang bik chuang lo. Ka chet that dan a zir a ni tih chu ka hria,” a ti bawk.
Result an puang a, Miss Mizoram a ni tih a inhriat chiahin a rilru a mang (blank) vek niin a sawi a, “Miss ka ni tih an puan khan ka rilru a blank vek a, chuan a hma lamah kal chhuak a, crown khum tir tur tih ka hria a, khatiang indawt dan tur ang khan awm ka tum,” a ti bawk.
Miss Mizoram hian lawmman Rs 2,00,000 bakah Vespa Scooter a dawng a, Women & Child Development-in an department ambassador-a an hmang nghal dawn bawk. Pahnihnain (1st Runner Up) Rs 1,00,000 leh Pathumna (2nd Runner Up)-in Rs 50,000 bakah Lash Studio atangin thilpek an dawng theuh bawk.
Top 5 a lang, top 3 a inhlangkai ta lo ten Rs 25,000 theuh an dawng a, top 10-a lang mahse, top 5 inhlangkai ta lo ten Rs 15,000 theuh an dawng ang a, top 10-a lang lo, finalist dang zawngin Rs 10,000 theuh an dawn bakah sub title pakhatin lawmman Rs 10,000 zel a keng tel dawn bawk a ni. Contestant-te hian Atomy India atangin thilpek an dawng bawk a ni.

Comments (0)
Add Comment