Mitdel football-ah Mizoram champion
November 8 leh 9-a Blind Football Tournament Siliguri, North Bengal-a neih zawh takah Mizoram Blind Sport Association tirh Mizoram Blind Football Team an champion.
Greater Lion’s Vision Cup 2025 hi Football Association for The Blind in Bengal (FABB) leh Lions Club of Siliguri Greater tangdunin a buatsaih a ni a. Indian Blind Football Federation hriatpui (recognised) tournament niin, state pali – Jharkhand, Nagaland, Mizoram leh West Bengal an tel. League match khelh a ni a, chuta point hmu sang pahnih – West Bengal leh Mizoram in final an khel a ni.
Final match-ah Mizoram team hian an captain Shimon Chorei hat trick siam hmangin West Bengal 3-0 in an hneh a, Mizoram team captain hi Man of the Tournament leh top scorer niin, he tournament-ah hian goal 6 a khung a ni.
Mizoram football history-a hriatreng tlak, kum 10 liamta Santosh Trophy-a Mizoram mipa team-in an champion-na khawpui, Siliguri-ah Mizo mitdel tlangvalten nomawi an la ve leh a, final match-a an hnehna goal pawh Santosh Trophy-a Mizoram team chakna goal zat nen a inang chiah a ni.
November 11 khan champion team hian relin Sairang an rawn thleng a. Mizoram Blind Sports Association (MBSA) hruaitu thenkhat leh mitdel football ngaihventuten an lo hmuak. MBSA senior vice president R Lalramthanga te chenna, Kanan Vengah champion puala Pathian hnena lawmthu sawina hun hmangin, zanriah an buatsaih sak nghal a ni.
MBSA general secretary, manager Jerry Lalramenga’n technical report a pe a. Mitdel infiamna chanchin tlangpui sawiin, Mizoram Blind Sports Association-in kum 2023 atanga mitdelte infiamna kawnga hma an lak dan leh Women’s Blind Football team a kum zawna champion an nih thu leh Men’s team an champion dan a sawi.
Football bakah Para-Judo pawh an khelh thin tih a sawi bawk. Judo-ah phei chuan World Championship-a tel pha leh world ranking-a No.10 ni mek kawltu an nih thu a sawi a, sawrkar leh Mizo mipuiin mitdel infiamna ngaihhlut sakin, bengkhawn deuh deuh se a duh tih a sawi bawk.
Mitdel football-ah Mizoram champion
