Mizo dana inthen leh ro
chun dan siamthat sawi
Mizoram State Law Commission chuan Mizo dana inthen leh ro inchun danah siamthat ngai a awm nual niin a hria a, remchang hmasa bera siamthat tum turin thu a dah.
State Law Commission hi an chairman Lala Khobung hoin Zirtawpni khan an thukhawm a. ‘The Mizo Marriage, Divorce and Inheritence of Property Act 2014’ hman mekah siamthat leh ennawn ngai sawiho niin, kil hrang hrang atanga thu lut leh Law Commission member-te atanga rawtna lut nen sawiho a ni. Uluk taka zirchian a nih hnu ah, siamthat ngai a awm nual nia hria in, remchang hmasa bera dan siamthat tura buatsaih nise, an ti.
Uniform Civil Code chungchang sawi niin, Law Commission of India-in questionaire a siam hmangin Mizoramin a mamawh loh thu sawrkar kaltlangin thlen a nih tawh thu sawi a ni. Hei bakah hian Mizoram State Law Commission thukhawmin The Constitution (Scheduled Tribes) Order 1950 siamthat a ‘Any Mizo (Lushai) Tribes’ tih chu ‘Any Mizo Tribe’ tia thlak leh ‘Pawi/ Lakher’ tia dah, ‘Lai/Mara’ tia thlak a lo rel tawh chu sawrkarin a kalpui dan zawhchian nise, a ti bawk.
Mizo dana inthen leh ro chun dan siamthat sawi
