Internet kaltlanga video awlsam zawka TV leh mobile phone atanga kan en theihna OTT (Over-The-Top) kan hmelhriat hnuah kan ramah pawh man chawia film en theihna tur app kan nei ve ta neuh neuh a, hetiang app kan neih hnuah hian Mizo film siamtute pawhin hlawkna an tel ve thei ta a, kan film industry pawh eizawnna a tling ve tan ta a, Mizo film thar pawh a khat tawkin kan tlangzarh ve ta reng mai. Tunah pawh film thar ‘The Killer’ tih chu August ni 28 zanah an tlangzarh dawn e.
He film-ah hian tlangval pahnihin YouTuber nih tuma, a bul tan nan ghosting hunting tih an tamna lamah tualthahna hmuna an kal tak dan leh, chung tualthattute chu dan leh thupek kengkawhtu, police hotute an lo nih leh avanga anmahni zawk puh let an nih tak dan te, hethil thleng avanga an thil tawn chi hrang hrang tarlanna a ni.
He film main character-ah hian mithar an inlan dawn a, a changtunu berah Miss Mizoram-a pawh lo tel tawh Muanpuii a inlan a, a mipa lamah Ruffy leh Zato te thiandun an inlan bawk. He film hi kum lama naupang deuh zawkte tan pawha en him, chhungkaw kima en ngam tur chi niin a buatsaihtute chuan an sawi. Film dang ang lo deuhin Jack Sparrow, Zoro leh Indiana Jones-a incheina hmangin starring-te hi an rawn inlan dawn bawk e.
‘The Killer’ co-producer hi RUNMAWI apps niin, film director hi Doordarshan a Mizo serial film siam kawngah sulhnu lo nei tawh Aldrin Zosangliana a ni a, director of photography, Albert Zosangliana pawh hi short film competition-ah winner lo ni tawh, film siam lama tawnhriat nei tha pawl tak a ni bawk.
Mizo film thar ‘The Killer’ Aug. 28-ah tlangzarh dawn
