Mizo hmeichhe boxer 4-ten hursualna lamah manager puh

Mizo hmeichhe boxer 4-ten hursualna lamah manager puh
Mizo hmeichhe boxer pali chuan an manager chu hursualna lama an chunga chet thawh thinah an puh a, thubuai thehluh a nih angin manager hi police-in thu zawhfiah atan an la tawh.
Thudawn danin, kumin June khan Rohtak Haryana-ah National Junior Boys & Girls Championship 2025 neih a ni a. Mizoram atang pawhin mipa leh hmeichhe boxer 12 an tel a ni.
Haryana-a an kal hma hian Ramhlun Sports Complex-a Mizoram Boxing Association Boxing Hall-ah an camp a; heta tang hian ‘khawih’ hi an tawk tan tawh nia sawi a ni.
Boxer pali hian Haryana atanga an rawn haw hnu, tunhnai khan an lungawilohna hi Child Welfare Committee hnenah an thlen a. Aizawl Police Station Women Cell-ah Protection of Children from Sexual Offences Act case-in FIR thehluh a ni.
Aizawla an camp chhung leh Haryana-a an awm chhung hian an manager hian hursualna lam rawng kaiin an taksa a khawihsak fo bakah tih luih nia ngaih theihin an ‘privacy’ a rawn bawhchhiat sak thin niin an sawi.
Mizoram Police Women Cell hian FIR an ziahluh bawhzuiin July 8 tlai khan pawikhawihtua puh hi an la nghal tih thu dawn a ni.