Tun kar tir lam khan Central YMA chuan Aizawl khawpui chhunga in sakna bungrua zuartute kokhawmin, hnamdang, Mizo hming hawha sumdawngte chungchang an sawipui a. Hetiang hnamdang, Mizo hming hawha sumdawngte leh Mizo, sumdawnna atana hming, hnamdang hawhtirtute chu April ni 10 atanga ni 30 chhunga inchingfel tura ngen an ni a.
Tunhma deuh khan zirlai pawl ten hetiang thil hi an lo buaipui viau tawh a, mahse awmzia a nei thei lo a. Tunah Central YMA-in hma a han la chho tan leh dawn a ni a, tunhma ang khan zawi zawiin a zuihral leh ang a, ngai kan awh leh mai dawn em ni ang, tih chu zawhna awm thei a ni zo ta a. Iron rod size tling lo zawrh chungchang pawh buaipui tur tawk chu a la awm reng niin a lang.
Central YMA lam hian ni 30 ral hnuah engtiang takin nge hma an lak zui dawn tih chu hriat ni rih lo mah se, awmze nei tham tura hma lak zui a nih erawh a rinawm viau.
Mizote hian ram leh hnam inrelbawlna thilah hian hma lam hun hi kan lo thlir thui thiam vak lo a, tun hnuah hian kan thlir thiam chho ve tan ta a, a nachang kan han hriat meuh hi chuan hriat loh hlanin hnamdang hian min lo phetthlu tep tawh a ni ber.
Hnam dangin Mizo hming hawha dawr an siamin, an hming hawh neitu Mizo ten anmahni dawr niawm taka dawr an nghak ve thin han hmuh hi chuan, a tlawmthlak ngawih ngawih a. Hnam dangin kan tualchhungah sal angin min rawn chhawr tihna a nih rualin, hnam phatsanna ang hiala ngeih theih a ni bawk awm e.
ILP a awm avang hian kan ngaih a tha a ni maithei, mahse ILP hmang hian hnamdang hian sumdawnna leh hna chi hrang hrangah min chimral thei tih tunah hian a takin a lo lang chhuak ruau ruau tawh a. Tuna hming hawha sumdawnna pawh hi, hetianga hmalakna hi awm lo ta se, tun atanga kum 50 velah chuan dawr lian zawng zawng nghaktute hi hnamdang an ni thei mai dawn a ni. Central YMA-in hetianga hma an la hi a lawmawm a, chutih rualin mipui lam leh sawrkar lamin kan tawiawm (backup) that a, kan tanrual hle a pawimawh dawn a ni.
Mizo hming hawhtira sumdawnna…
![](https://theaizawlpost.org/wp-content/uploads/tap_logo-min-large.jpg)