Prof. JV Hluna, Ex MLA
Pu Lalbiaktluanga Khiangte IAS chu kum 36 lai a service hnuah Oct 31, 2024 ah Jharkhand State Chief Secretary atangin a lo pension ve leh ta a. State liana Chief Secretary nih hi Mizo te tan a har hle a ni tih kan hria a ni. Hetia CS a ni thei hi Mizo lawmin kan lawm a nih kha.
Tluanga hi Junior te SDO emaw lek a la nih lai khan Silchar Mizoram House, room khatah tuilian avangin kan tang khang dun a, Mizoram House kha kawng thleng rawkin tui lianin a rawn chim a, nithum chu kan cham ringawt mai a. Tlema a kam deuh chuan Pu Vanhlira te Truck, ar chaw phur hawng turah kan chuang a. Kawng pawh a chim vek avangin mau hi kawng zawh sual loh nan an phun zel a. Chutichung pawh chuan kawng ber a lan loh avangin fimkhur a ngai hle. Driver chuan a zawh sual palh a, kawng sir tui li put mai ah chuan min bun a, vai tui thiamin min chhanchhuak a, an lawngleng min hire tir a, an inchhiar zat apiang ‘ok’ tih a ngai, kan pek zat ka hre tawh lo.
Kabuganj-ah riak turin kawngsirah kan chhuk a, zan a ni tawh a, vai pakhat Zotawng thiam hian min khawngaih ni awm tak hian ‘heng laiah Hotel a awm si lova, riahna a awm lovang, kan inah lo riak rawh u, in motor hian kal ila ka hruai ang che u,’ a ti a, kan ‘aw’ ve ta mai a, kawngpui atanga pengin hla deuh kan thlen chuan min suam tumin min bei ta thut a, kan insual a ni ta ber mai a. Driver chu “rang takin in turn la, a chak thei ang berin Kabuganj Bazar kha pan rawh, tumah chil hlau suh” kan ti a. Kabuganj Bazar kan thlen chuan kan han inen vel a, hliam leh engmah hloh kan nei lova, kei chuan vaipa Torch light cell 3 hmai hlai ang chi kha kan inbeihnaah chuan ka laksak a, Tluanga chuan engmah a laksak ve lova, engmah an laksak lo bawk. Kabuganj kawngpui sir thingpui dawr dawhkan chu kan bawh a, thosi a tlem lova, mutthilh zeuh chu kan nei awm e.
A tukah chuan tui a la lian mup mup mai si a, lawngleng kan hire leh a, hlauthawng angreng takin Bhaga chu him takin kan thleng a, Aizawl haw na tur motor a lo tam tawh a, riak lovin Aizawl kan thleng chu kan lawm teh asin.
Hetih chhung hian Tluanga hi kan inhrechiang hman hle a, a ipte a thuk lova, a lei a chet tlem em em a, a tlawmngai hle bawk. ‘Bihar-a ka Sub-division-ah College panga a awm a, Board-ah ka chairman vek’ a tih khan ‘eng tawng nge in hman, eng tawngin nge minute in ziak’ ka ti a. ‘Hindi vek kan hmanga, minute pawh Hindi vekin kan ziak’ a ti a, ‘harsatna i nei em’ ka tia, ‘nei lo, engmah tawngah harsatna leh buaina ka nei lo’ a ti a. Ka nau duhtak Tluanga hi fel ka ti a, Pathian zarah ala kaisang zel a, Chief Secretary hial ala kai thei ang ka ti a, amah ka ngaihsanna a zual hle. Hetia a lo pension hian ka lawmpui takzet a ni.
Pu F. Lalremsiama, IPS (RR)- Regular Recruit 1965-in kan thalaite chona Aizawl Post ah tha deuhin a rawn ziak a. Kum 1965-ah te chuan pathum ngawt IAS (RR) kan nei a, 1967-ah pahnih, 1970 – ah pahnih bawk. Kum 1974 – ah pali kan nei rual thawt bawk a, 1975 – ah pahnih kan nei leh a. Kum 1979-ah pahnih, 1988-ah pahnih, kum 1989-ah pahnih bawk kan nei leh a, 1977-ah pahnih bawk kan nei leh thei a. IAS (RR) kan neih hnuhnun ber chu kum 2014 daih kha a ni ta mai awm e.
IFS hi 14 kan nei tawh a, a hnuhnung ber Muanpuii Saiawi hi 2005 batch a ni a, IPS hi RR a tling hnuhnung ber chu David Lalrinsanga 1995 ami daih kha a ni. IPS (Postal) phei chu Joseph Lalrinsanga 1999 leh Lalfakzuala Chhangte 2001 te hi service lai kan neih a ni awm e. IA&AS Pu Vanlalchhuanga 1998 leh Elvina Leivom 2015 kan nei a. Indian Civil Account Service (ICAS) ah mi pathum, Eddie L. Khawlhring 1995 leh R. Lalremruata 1996, Vanlaldina Fanai 2002. IRS Custom and Excise-ah hian 5 kan nei a, L.Beimopha 2006, Lalhmingmawia Ralte 2009, Thari Sitkil 2010, Eric Lallawmpuia 2013, Malsawmtluanga 2014 an ni. IRS Income Tax-ah chuan service lai 7 kan nei a; Esther Lalruatkimi 1991, David Chawngthu 1994, Anne Kapthuama 1994, Rintei Renthlei 2007, Lalmalsawma Pachuau 2008 leh Lalramsanga Sailo 2008 te an ni. Indian Defense Account Service (IDAS) pahnih, Zothankhuma 1991 leh Lalbiakchhunga 2013 te kan nei a. IES (Indian Economic Service) ah pahnih, Vanlalramsanga Chawngthu 2001 leh Ramdinpuii Renthlei 2012 te hi an ni. IRAS (Indian Railway Account Service ) ah mi pahnih bawk – KT Beichoa 1990 leh David Lalmalsawma 1993 an ni. Central Secretariat Service ah chuan Lalchhandama chauh kan nei a ni.
Heti khawpa service hlu, Mizo missionary te, zirlai leh zin veivak apiangte tana tangkai hi Sorkar Super IAS Scholarship-a tling an awm ka hre lo. India rama min titlangneltu, neitu rilru kan put ve theihna, indirect-a Pathian thu kan put darhna te hi an tlem ta em mai a. High School naupang nih lai atangin nasa takin i bei teh ang u.