Mizo lehkhabu vangin rualawt

Vanapa Hall hulhliapah dawhkan hungin lehkhabu an pho dul a, lehkhabu en leh leite an inpel nak nak bawk. Chung a hmuh chuan a rualawt a, an khuaah lehkhabu hetiang zat hi thleng ve se a duh!
Malsawma a ni a, Myanmar-a Varpui khaw mi a ni. Vanapa Hall hulhliapa Lehkhabu Pho Runpui, Mizo Writers Association buatsaihah a kal ve a, Mizo lehkhabu thahnem tak a hmuhin a rualawt a ni.
“Kan khuaah hetiang lehkhabu hi lei tur a awm lo a, chhiar duh pawh ni ila chhiar tur a vang a. Mizo lehkhabu hi chhiar thin ila hma kan sawn ang a, hnam chanchin te kan hriat phah ang a,” a ti a, an khuaah Mizoram lehkhabu thleng se, an khaw mipuiin chhiar sup sup se tiin a suangtuah a ni.
Mizo tawng chhiar tur an hmu lo a ni ber a, chuti chung chuan Mizo tawng an ziak thiam, an chhiar thiam bawk. Kohhranin a zirna a hawng a, chutah chuan an zir thin.
Myanmar-ah chuan kawl tawngin lehkha an zir a, Zo hnahthlakte pawhin kawl tawng vekin zirna bul an tan. Kohhranin mahni tawng zirna hun a buatsaih thin a, chu chu an tan a hlu hle. Varpui khuaah chuan thal laiin kohhranin Mizo tawng zirna hun an hawng thin.
Malsawma sawi danin, Varpui-ah hian kohhran pawl hrang hrang an awm a, chung kohhran pawl hrang hrangte chuan Mizo tawng, a ziah leh a chhiar zirna hun hi an hawng hlawm. Chutianga an inzirtir avang chuan sikulah zir lo mah se an ziak thiamin an chhiar thiam a, mahse chhiar tur an hmu pha lo khawp mai.
Tahan-ah lehkhabu dawr a awm a, chuta an hmuh ang ang an leite chu Mizo lehkhabu an neih te a ni mai a, mahse Tahan pawh hi lehkhabu lama rualawt tak an ni ve tho. Aizawl atanga thawn thin, mi thahnemngai an awm.
“Mizorama hla lar hi kan hre ve vek a, lehkhabu lar pawh kan hre ve vek. Mahse a lehkhabua tak chu kan hmu lo a ni mai a, a ngaihven chin hi chuan Mizo lehkhabu lar hi chu an hria ang,” a ti a, “Mizo lehkhabu chhiar tur kan nei lo hi a pawi khawp mai a, Mizo tawng hi tawng nan kan hmang a ni mai a, kan tawng tawp a ni mai. Chuvang chuan kan thiam thuk lo a, a grammar lam pawh kan hre thuk lo,” a ti bawk. Chumi a sawi rual chuan, Mizorama a thiante’n Mizo tawng thiam an tih thu an hrilh fo tih a sawi tel.
“Mizoram hi kan ngaisang a, zin kan chak a. Mizorama lar hi kan lo hre ve zel a. Mizoram lehkhabu larte hi rawn thleng ve se kan ngaihlu ang. Hma kan sawn phah ang. Chu chu ka rualawhna a ni,” tiin a rualawh thu a sawi a, “Mizo lehkhabu hetiang zat ka hmu hi nuam ka ti a, ropui ka ti lutuk,” a ti bawk.