Mizote hi mi chak leh huaisen ngaisang hnam kan ni a, hma khaw sang atanga tun thlengin mi chak, thahrum ngahte’n ngaihsan an la hlawh em em reng. Pa chak inelnaah rau rauah pawh inchai chakte’n ngaihsan an hlawh fal em ni ang aw a tih theih.
Palian inchai a awm tawh chuan Mizorama khelmual ropui ber Lammualah meuh pawh mipui an leng ngai meuh lo. Palian inchai hian ngaihven a hlawh em em reng, thun thlengin. Tuntum hian Mizo zinga palian inchai chak filawr zualte kan han tarlang leh dawn a ni.
Vanlalkulha
Lalkulha tia Mizo tawh phawtin an hriat lar Vanlalkulha hi palian, pian thiam zet mai a ni a. Palian champion hmasa ber ni awm renga mawi a ni. Ft 6.1 inch zeta sang a ni a, kg 85 a rit a ni thin.
A vanglai hmu phakte chuan a chakzia bakah a pian thiamzia hahipin an sawi thin a, pa dam thluam mai a nih vangin ngainat pawh a hlawh hle.
Lalkulah hian kum 1971 ah Lianhluma hnehin Mizo palian inchaia champion hmasa ber nia sawi a ni. Kum 1971 hian Mizoram Wrestling Association (MWA) din a ni a. MWA buatsaihin kum 1972 khan a vawi khatnan palian champion zawn a ni a. Palian inchai hmuhnawm takah Lalkulha hian a khingpui Robuanga a hneh a, MWA buatsaihah Palian Inchai champion hmasa ber a ni.
Kum 1975 khan Lalkulha hian kha tih laia pachak pahnih Vumzathanga leh Vanlalmawia te a hneh zui leh bawk. A kawnghren chuhpuitu pahnih a hmachhawn a, chak ve ve bawk hian khatih laia Lalkulha chungchuanzia a lantirtu awm e!
Palian inchaia a vawk lal len laiin thiam thil nei tha, chak bawk si F Tlangsiama chu kum 1977 khan a hneh lova, a rorelna tihtawpsak a ni. Thiamthil nei tha tak Tlangsiama a hneh lo hi Lalkulhna hian a tuarthiam lo hle mai a, tumruhna thar neiin a inzir belh nasa hle. A rorelna tihtawpsaktu Tlangsiama ngei hi kum 1983-ah a hneh let leh ta ngat bawk.
Lalkulha leh Tlangsiama te inchai nawn leh hi palian champion zawnna erawh a ni lo. Hetihlai hian palian champion chu Tlangsiama hnehtu Chalchungnunga a ni. Lalkulha leh Tlangsiama te inchai hi mipui hmuh chak em em mai a ni a. An mahni an lo incho tawn zek zek bawk nen incho leh incho hi inbuan nawn tir leh an ni a, an inchai nawn leh hian ngaihven pawh a hlawh hle.
Lammuala mipui khat hmuk hmaa Lalkulha’n hnehna a chang a, a tlawm tawhna a chhanglet. Lalkulha leh Tlangsiama te inhmachhawn nawn leh tura ngaih an nih laiin an inhmachhawn zui ta lo.
F. Tlangsiama
Palian leh chak bawk si Lalkulha hneh thei an awm loh ren hnuin chakna bakah thiamna ril nei F. Tlangsiama a lo chhuak a, Mizo inchaiin bung thar a kai. Tlangsiama a lo lan takah hian tharum ngah bakah thiam thil neih tel pawimawhzia a chiang ta viau a. Mi chak tak takte pawhin thiam thil neih tel an tum ta fur.
Pian thiam fahran Tlangsiama hi tharumah ngam chiah lo mah se Judo a thiamna hmangin Lalkulha hi kum 1977 khan a hneh a, palian champion thar a ni.
Khatih hun laia hneh theih loh ang hiala ngaih Lalkulha a hneh vangin F Tlangsiama hian ngaihsan a hlawh hle a, Zoram khawvel a dengchhuak nghal dawt. Vanlalkulha meuh hneh mah se, a vul lai erawh a rei lo viau thung a, kum hnih bak a champion thei lo. Kum 1979 ah Chalchungnunga a hneh lova, kum 1983-ah a hmaa a lo hneh tawh Vanlalkulha a hneh lo leh bawk.
Chalnungnunga
Vanlalkulha leh F Tlangsiama te inchai kha kha tih laia mipui hmuh chak ber a ni a. Anni pahnih inkarah hian boruak tang tak a awm ut reng. Lalkulha leh Tlangsiama te inelna boruak lian tak karah Chhim pa chak Chalchungnunga a rawn chhuak hlawl a, Chala hian Lakulha leh Tlangsiama te boruak lian tak chu hun engemaw chen a vaw dai.
Chalnungnunga hian Lalkulha a hneh vanga lar thar tak F Tlangsiama hnehin 1979-ah a champion.
Palian, dar pharh hlai leh kawng fek mawi tak Chala hian kum 1982 khan Nurvunga hmachhawnin a kawnghren a humhim.
Chala hi a hun laia a chak fal em vangin chotu a nei lo vang vang a, kum 1988 thlengin title fight a hmachhawn lo. Palian huangah ro a rel hneh em vangin Palian inchai boruak a hniam hman a, palian inchai thawm a reh vung vung.
R. Vanlalduata
Chalchungnunga hi kum kua (9) zet a champion hnuin palian huangah rin loh lam atangin hmel thar a lo lang a, amah chu kum 21 leka upa Vanlalduata a ni.
Palian, chak leh judo thiam tel bawk Duata leh Chalchungnunga te hi December 12, 1988-ah an inchai a. Palian zingah pawh lian fal bik Vanlalduata hian harsa takin Chalnungnunga hi a hneh hram a, palian champion thar a ni.
Harsa taka Chalchungnunga hnehtu Vanlalduata hian palian huangah kum 15 chhung zet ro a rel a, amah hneh thei reng an awm lo.
Chalnungnunga a hneh hnu hian a hun laia pa chak – KVL Siamkima, T. Lalrinpuia, Laltanpuia, C. Lalengmawia, Lalthlangdika leh Saidingliana Sailote a hneh vek a. April ni 2, 2003-ah Saidingliana Sailo a hneh nawn leh hnuin Vanlalduata hian Mizo inchai chu tlawm nei lovin a chawlhsan zui ta a ni.
Mizo te infiamna ngaisan tak palian inchaia ropui ber chu R. Vanlalduata a ni a. Chhuanthar zingah palian chak tak tak lo chhuak zel mah se, ‘Duata a hneh ang em aw”, tih an ni kum khua tawh ang. Chu chu palian huanga Duata chungnunzia tifiahtu a ni.
Saidingliana Sailo
R. Vanlalduata a chak fal em vangin palian inchai boruak a dai duk a, palian inchai thawm a reh vung vung. Hun rei tak Duat-a’n ro a rel hnuin pa chak leh huaisen Saidingliana Sailo a rawn chhuak nawlh a, palian inchai boruak a nung thar leh vut vut.
Saidingliana Sailo hi pumraw lian tak ni lo mah se thahruai a nghah a, a pumrua ngaihtuahin a chak kher mai. A chak em em bakah a huaisen a, boruak siam thiam em em bawk. Palian champion ni tawh zawng zawngah boruak siam thiam ber a ni hial awm e!
Saidinga hian Vanlalduata hneh lo zawn mah se thil mak a thlentir. Mizo chhulchhuak zingah tumah rengin an la bawhbeh loh Vanlalduata ngei mai chu vawi hnih ngawt a bawhbet ta mai a, Duata bawhbet thei hmasa ber a ni. Vanlalduata nen an inchai hmasak tumin vawi hnih ngawt bawhbet bawk mah se vawi ruk ngawt bet zawkah a tang tho thung.
Vanlalduata a bawhbeh tak hial vangin Saidingliana hian boruak a nei thar hle a, palian inchai boruak a nung thar leh ta vut vut bawk. Vanlalduata nen hian 2003-ah an inchai nawn leh a, round 10 chhunga chak zawk an awm theih loh vangin round pek belh an ni a. Round 11-naah Saidinga hi vanduai zawkah a tang a, Duata lakah a vanduai nawn leh.
Vanlalduata lakah tum hnih a tlawm zawn hnuin Saidingliana Sailo leh Lalengmawia ten kum 2004-ah R Vanlalduata kalsan kawnghren an inchuh.
Inchai hmuhnawm leh boruak lum tak hnuaiah round 10 chhungin chak zawk an awm thei lo. Round 10-ah chak zawk an awm lova, Engmawia point paihsak a nih vangin Saidingliana Sailo hi palian champion thar a ni ta nge nge.
A huaisen leh chak vanga mipa te lawm rawn, a chak leh hmelthat vanga hmeichhiate ngaihzawn rawn Saidingliana Sailo chuan a phu ang ngeiin palian champion kawnghren a hreng ve ta.
Dominic Lalremsiama
April 8, 2005-ah Saidingliana Sailo hian a kawnghren chuhpuitu Dominic Lalremsiama a hmachhawn a, chak lo zawkah tangin a kawnghren a hloh.
Saidingliana hnehtu Dominic Lalremsiama hi kum 19 mi lek a ni a, kum naupangte ni chungin inelna ngaihhlut hlawh leh hautak takah a champion.
Kum naupangte ni chunga a champion vangin a hmabak a eng viau a, lakah beiseina pawh a sang hle. Beiseina sang tak nena thlir a nih laiin LR Bawlliana nen kawnghren an inchuh tumin hliam na tak a tuar a, hun lo takin palian inchai a chawlhsan a ngai ta thung a. A laka Mizo mipuite beiseina mei chu hma takah chhem mih a ni.
LR Bawlliana
Bawla hi a pumrua a lian falua lo a, rih zawngah rit tak a nei hek lo. Palian huangah amah aia lian leh rit zawk a hmachhawn zel a ngai a, atan a harsa bik thin nia ngaih a ni. Chuti chu ni mah se a chak hrim a, palian champion huangah a hming a chuang kumkhua tawh dawn.
LR Bawlliana hian May 19, 2006 khan champion lai Dominic Lalremsiama a hneh a, palian champion thar a ni. Inchai a luhchilh tirhin LR Bawlliana hi thiamna bik nei lo leh zei lo ve tak mai a ni a. Palian champion a ni thei hi a thawhrim leh taimakin a hlawhchhuah liau liau a ni.
Remsiama a hneh hnuin LR Bawlliana hian a kawnghren chuhpuitu PB Lalnienga chu Marh 23, 2007 khan a hneh a, a kawnghren a humhim zui leh.
Mizoramah palian champion a nih bakah hian Bawla hi North East Games 2006 khan rih zawnga tling phak chiah lo chungin Open-weight-ah Mizoram ai a awh a, Nagaland-ah hian chak ber niin Gold Medal a hlawhchhuak nghe nghe.
Mizoram aiawhin a champion a ni satliah lova, Wrestling Open-weight-ah Mizoram pawn, state danga champion thei hmasa ber nia hriat a ni nghe nghe. 4
F. Lalhmingmawia
Dominic Lalremsiama leh PB Lalnienga te lakah round 10 khel tluan lova hnehna chang ve ve LR Bawlliana hian March ni 7, 2008 khan amah chotu F. Lalhmingmawia a hmachhawn a. A pian thiam vanga Chalnungnunga nena khaikhin hlawh hial thin LR Bawlliana lakah F. Lalhmingmawia hian hnehna a chang a, palian champion thar a ni.
Kum naupang, palian, chak leh che rang bawk si Amawitea hian December 11, 2009 khan PB Lalnienga nen kawnghren an inchuh a, round 10 a zawh thlengin bet zawk an awm lo. PB Lalnienga nen hian thian inkawm ngeih tak an ni bawka an inchai hian beisei a phak lo.
Lalnunfela
Hun rei tak chhung palian champion ni thei tura ngaih F Lalhmingmawia hi kum 20 mi, palian leh chak zet mai Lalnunfela chuan choin a kawnghren a rawn chuhpui. Amawitea leh Fela te hi inchai hmuhnawm takah Lalnunfela chakin, palian champion thar a ni ve leh.
Lalsangliana
R. Vanlalduata a chawlh hnuin palian huangah chak fal an awm lova, champion thar an awm zut. Palian champion thar an awm zut hnuin Lalsangliana hun a lo thleng a, palian huangah pa chak fal an rawn awm ve leh ta.
Pumraw lian, Mizo mi chak pian tak mai Lalsangliana hian a elpui lian ni thin Lalnunfela hnehin kum 2014-ah palian champion thar a ni.
Mahni inthununna nei tha, pa dam thlup mai Lalsangliana hian a kawnghren chuhpuitute a hneh chho ta zel a. Lalnunfela vawi hnih a hneh tawh bakah PB Lalnienga a hnehin a kawnghren a humhim zel, kum 10 chhung zet champion a ni tawh.
Sangliana hi Mizoram a palian champion a ni satliah lova, Tahan-ah a han champion tawh bawk a, Mizoram international palian champion a ni.
Sangliana hian amah aia lian leh ritte pawh pawm betin, che thei lek loten a siam mai thin. Amah aia lian leh rit zawk PB Lalnienga a pawmbeh tumin a hmuna entu putar pakhat chuan Sangliana hi Mizo a hmuh tawh zawng zawnga chak ber a nih thu hahipin a sawi a, Mizo zingah hneh thei an awm a rin loh thu uar takin a sawi bawk.
Kum 2014-a champion tirh atanga kum 2024 thlengin Sangliana hian amah ter tawk deuh a la tawng lo a ni ber a. Inchai a chawlhsan a nih ngawt loh chuan hun rei tak champion ni thei tura ngaih a ni.
Khawvelah Mizo kan awm chhung chuan palian inchai hian ngaihhlut a hlawh rengin a rinawm a. Mizo zingah chuan palian champion title hi mimalin a hlawhchhuah theih title hlu leh ngaihsan hlawh tak a nih zui zel ang a. Mi chak filawr, palian inchai champion te an ropui nawn fovin a rinawm.