Sana awm hma chuan artukkhuan hi hun bi enna tangkai a tling; nuin an feh dawn te hian ‘Artukkhuan a par hunah chaw in lo chhum dawn nia,’ tiin an fate an chah thin.
Sapho pawhin ‘four o’clock flower’ an ti a, tlai lamah a par vul thin. Pi leh pute hun atanga pangpar lar a ni a, tunlaiin a lar thar leh a ni awm e.
Aijal Club Park-ah Mizoram Florists’ Association-in Florists’ Fair an buatsaih a, heta tel pangpar khawihtute chuan Mizo pangpar hrang hrang a la lar reng thu leh artukkhuan pawh a lar thar leh thu an sawi.
Kumtluang a lar tih an sawi a, par hun loh lai a neih loh avangin miin phun ve an duh tih an sawi. Chuailo pawh a lar an ti a, Mizo chuailo leh ram dang atanga lakluh a lar an ti.
Chuailo hian a hming a pu zo a, a par rei; hei hi a hlutna pakhat a ni. Mahse par hun bik a nei thung. Kumtluang hi a par a tla mai a, a par hian a daih rei lo. Mahse par hun loh lai a nei lo a, kum tluanin a par thei. Chuailo pawh hi par hun bik a nei an ti na a, a par hun hi a rei; Florists’ Fair-a inphote chuan March thlaah a par tawh a, August-ah pawh a la par an ti.
Derhken a lar a, hmanlai derhken, Mizo derhken tak tak kha tunlaiin a hlutna a pung an ti. Mizo derhken khan rim a nei a, a rim chu thlai leh pangpar hrikin a hua a ni awm e. Chuvang chuan miin Mizo derhken phun an duh leh a, a neite chu zuar lovin an inpe kual thin.
An sawi danin, sappangpar a lar reng a, zamzo pawh a lar reng. Nuaithang pawh a lar thar leh a, miin an uar thar leh.
Dingdi a vang tan an ti a, a rem ang tih hlauva ching tang tang pawh an awm. Dingdi hi uitepangangin a bawm thin a, hei vanga ngaitheilo an awm nia an hriat thu pangpar chingtute chuan an sawi.
Pangparah rose leh sharon par a lar reng a, hralh a tla reng, miin an duh reng. Sharon leh rose hi a chi hrang hrang, ram hrang hranga mi hi Mizoramah a lo tha duh zel an ti. Anthurium a lar reng an ti a, thawnchhuah turin a daih lo zawk an ti.
Mizo pangparin ngaihhlut hlawh
