University leh college-a Mizo subject zirtirtu inzawmkhawm pawl ‘Mizo Literature and Language Teachers’ Academy (MILLTA)’ chuan Zirtawpni khan Aizawlah inkhawmpui an hmang.
Hmanpuitu Mizo Language Development Board chairman R Lallianzuala chuan Board thutkhawm hmasa berah Mizo tawng tihhmasawnna atan cell pathum – Grammar Cell, Orthography Cell leh Research and Documentation Cell din an rawt tih sawiin, Mizo A Aw B pawh tih danglam a tul theih tur thu a sawi. Mizo tawng tih hmasawnna atan MILLTA chu pawl tangkai tak tur a nih thu sawiin thawhhopuiah a sawm nghal a ni.
Chawhnu lamah seminar an nei a. ‘Tunhnaia Mizo Literature Dinhmun : Harsatna leh Hmathlir (Recent Trends of Mizo Literature : Problems and Prospects)’ tih thupui hmangin mithiam leh scholar thahnem takin thu an sawi a ni.
Report atanga a lan danin, MILLTA-ah hian member 119 an awm mek a. An inkhawmpui hi adviser pahnih – Prof. Laltluangliana Khiangte leh Prof RL Thanmawia ten an hmanpui.
Inkhawmpuiah hian lehkhabu pahnih chu a hmanpuitu hian a tlangzarh a.An member pahnih Ph.D nei thar hnenah chawimawina an hlan a, member pahnih pension-a chhuak te an thlah bawk.
Mizo subject zirtirtu khawmpui
