India ramri vengtu Border Security Force-a luh theihna inhawng mek chu Mizo thalaiin an ngaihven lo tih chief minister chuna a sawi a. BSF bakah ramri hnaih vengtu tur tho Territorial Army chu Mizo thalaiin ngaihvena lut turin a ngen tih a sawi.
Chief minister Lalduhoma hian thuchah a siam a. Tunlaiin Mizoramah BSF-a lut tur lak mek an ni a, thalai 300 lak turah an beisei angin Mizo tlangvalten an bengkhawn tawk lo riaua an hriat thu a sawi. “Recruitment hi a kal mek a,kan ramri venghim tura ngaihtuahna seng mi, ram hmangaih mi an luhna atana kan duh a ni. Mizo tlangval tam takin he hun remchang hi lo hmang tangkai turin ka chah a ni,” a ti.
Mizo hlang battalion, Territorial Army kan nei dawn tih chief minister hian a sawi bawk a. Chumi atan chuan recruitment tih tep a ni tawh tih sawiin Aizawlah leh Lungleiah recruitment ti turin company khat ve ve an lo thleng tawh a, Champhaiah company khat awmna tur an ngaihtuah leh mek tih a sawi.
“Mizo hlang awmna tur a ni a, a tirah battalion kan din nghal phut thei loa, mi 70 lak phawt tura tih a ni. Amaherawh chu mi 150-a bul min tan sak turin kan dil a, 150 lak an ni dawn. Hemi hnu hian hmeichhe tan bik pawh kan la dil zui zel dawn. Territorial Army hi battalion puitling la ni chho tur a ni a, kan ramah an awmna tur hmun nghet la buatsaih chhoh zel tur a ni,” a ti.
Territorial Army phei chu, ramri hrula duty tur, information khawnkhawm a, sawrkar mit leh beng ber atana chhawr tur an ni a, a pawimawh em em dawn tih a sawi a. Mizo thalaiten ngaihven se, tiin, “Mi tha tak tak, tam tak in awm tih kan hria a, eizawnna atan pawha tlak tak thil a nih avangin, thahnemngai taka he hun remchang hi lo zuan turin ka chah che u a ni,” Lalduhoma hian a ti.
Mizo thalaiin BSF-a luh an ngaihven lo: – Chief minister
