Zaithiamte’n hlawh an nei a, heti lamah chuan Zoram mipui hi an bengvar khawp mai. Writer-te erawhin kut hah man an dawng mumal lo a, dawng hi an awm ve zeuh zeuh chauh ang tih a ni.
Pawl emaw khawtlang emaw, tute emawin eng thil emaw lawm nan magazine/lehkhabu an siam thin a, souviner han tih hian Mizo rilru-ah magazine/lehkhabu a lang thin ang. Chuta tan chuan thuziak thawh turin writer-te an sawm a, lawmthu sawina lam erawh an pe mumal lo.
Youtube a lo chhuak a, writer-te kutchhuak youtube-a lo chhiar an awm thin. Writer-te hian kut hah man dawn chu sawi loh, an thuziak an chhiar tih an hriat loh chang a awm.
Lehkhabu/magazine-a an thuziak thawhtu writer-te zingah a lehkhabu/magazine pawh dawng lote pawh an awm thin.
Nikum July ni 27 khan Mizo Academy of Letters (MAL) leh Mizo Writers Association (MWA) te’n thuziak mite kut hah man tur hi an duang a, ngenna an chhuah. Mahse vawiin thlengin hei hian ngaih pawimawh a la hlawh lo niin a lang.
“Kut hah man hi writer-te hian an la hmu chuang lo. Hmu hi chu an awm ang a, mahse a tlangpuia lak chuan an dawng lo,” MAL president Prof RL Thanmawia chuan a ti.
MAL leh MWA te’n an duan dan chuan, magazine/souvenir chhuah tur thu ziah manah Rs 1000, lehkhabua chhuah tur thu ziah manah Rs 1000, seminar paper tur ziah man Rs 2000, youtube-a chhiar tur ziah manah Rs 5000 te ni se tih a ni a, hetiang hian writer-te pek thin ni se tiin nikum khan ngenna an chhuah tawh.
“A chhuahtute hian a ziaktute hi a bute an pe a, a bak chu a tih theih tak tak loh, thil han tih a har khawp mai,” Prof RL Thanmawia chuan a ti a, “|henkhat, an thu chhuahna tur zawng an awm ve tho a, chuvangin han inngen viau pawh a har ve tho a,” a ti bawk.
Sum leh paia hlawkna uma thuziak lama inhmang a nih loh thu a sawi a, Mizo writer-te zingah sum uma ziak chu an awm ve tho ang tih a rinawm thu, mahse writer-te hian chhan dang vangin an ziak ang tih te a sawi.
Mizo writer-te’n kut hah man dawng mumal lo
