Mizoram bomb-tu Congress lam kan hawi thin hi a pawi – MBJP president

Mizoram bomb-tu Congress lam kan hawi thin hi a pawi
– MBJP president
Mizoram tana thil tha titu BJP kan hlat tlat lai a, Mizoram rawn bomb-tu party Congress lam kan hawi leh tlat thin chu a pawi hle tih BJP State president Vanlalhmuaka chuan a sawi.
BJP State office-a thu a sawinaah Vanlalhmuaka chuan, Prime minister Modi kaihhruai sawrkarin Mizoram tan hmasawnna a thlen tih a sawi a. Mizorama rel luh dan turah kum 1998 daih tawha rel lo lut tura sawrkar laipuiin a pass tawh, compensation avanga rel kawng siam hleihtheih loh chu Modi sawrkar chuan a chingfel a, tunah chuan Sairang thlengin rel kawng a rawn lut ta tih a sawi.
Mizoram issues rei tak lo ni tawh Assam Rifles sawn chhuah chungchangah pawh Modi sawrkar bawkin min chinfel sak tih sawiin, “Mizoram tana thil tha ti thintu party kan hlat tlat a, Mizoram bomb-tu party Congress lam kan hawi leh tlat thin hi a pawi hle. Ram leh hnam hmasawnna dal zawnga ke kan pen zawk thin avang hian hmabak eng tak nei tur hian a thim lam kan pan leh phah thin. BJP buaipui ber chu Viksit Bharat (Developed India) a ni a, Hindu-a inlet tura midang sawm hi kan tum a ni lo. Kan sakhuaah theuh mi piangthar leh kan sakhaw tana mi rinawm nih hi Central BJP hotute duhdan a ni,” a ti.
Mizorama khaw hrang hrang an fannaah khaw kilkhawr zawkah kawngpui a chhe lutuk chu a manganthlak hle tih sawiin, PMGSY hmanga central-in kawngpui tha kan neihna atana sum min pek kaltlanga kan kawngpui laih, kan thawk tha duhlo chu kan ram tihmasawn lo tu a ni tih BJP State president hian a sawi.
PM Narendra Modi-a’n sum chawi ngai loa bank account hawn theihna, PM Jan Dhan Yojana kaltlanga account hawn theihna a din khan, tam takin an awih loa, tunah chuan mirethei zawkten an tangkaipui tawh em em tih a sawi. “PM Scheme hrang hrang atangin themthiamna hmanga thil siamchhuah leh loneitute thlai thar hrang hrang thawn chhuah kawngah hma kan sawn tawh hle a. Hmasawnna tak tak a thlenna turin miretheite chawikan a pawimawh hle. Heng atana PM scheme tha tak tak India sawkarin a duan hmanga chawikan kan nih ve theih hun hi BJP Mizoram chuan kan thlir mek a ni,” a ti.