Mizoram state budget 2026- 2027 chu finance changtu chief minister Lalduhoma chuan Ningani khan Assembly House-ah a pharh a. Sawrkar leh turte rulh atana thil lo lei bat emaw sum awm siloa hna lo inthawhtir ve ringawt emaw avanga ba siamchawp (commited liabilities) awm tir loh an tum dawn tih a sawi.Chief minister hian kum 2026- 2027 chhunga sawrkar sum hman tur ruahman cheng vaibelchhe 17076.92 bakah kum 2024- 2025 a sum ruahman sa indaihlohna phuhrukna tur – supplementary demand cheng vbch. 3742.25 a pharh tel nghal a ni.
Kum 2026- 2027-a Mizoram-in ama puala chhiah a huiluh ve tura beisei chu cheng vbch. 2759.75 a ni a; 2025- 2026 sum ruahman atanga a punna chu zaa 5.48 a ni tih a sawi. GST chu state sum hmuh tamna ber tura ngaih a ni a, vbch. 1200 hmuh tum niin, a vaia hmuh beisei atang chuan zaah 43.48 a ni pha. A pahihnaah power sector revenue a ni a, vbch. 860 (31.16%) beisei a ni tih a sawi bawk.
2026- 2027 ah hian sum hman aia a hmuh tamna (revenue surplus) vbch. 899.84 awm thei tura ruahman a ni tih chief minister hian a sawi a. 2025- 2026 budget estimate vbch. 562.91 atang chuan pung viau angin lang mah se, kum kal mek revised estimate-ah sum indaihlohna vbch. 376.41 a awm dawn thung tih a sawi.
Hei hi sawrkar laipuiin chhiah tlingkhawm atanga state tin a sem tura a ruahman sa, chhiah a luh that loh avanga state chan tur a tihhniam leh tak vang bakah pumpelh theih loh sum hmanna tur hrang hrang a awm vang a ni tih a sawi a ni.
2026- 2027 chhunga sawrkar inrelbawlna senso (revenue expenditure) a sum hman tur dah chu vbch. 14094.47 a ni a, hei hi budget pum atanga chhutin zaa 82.53 a ni. Kum kal mek 2025- 2026 a vbch. 12384.70 ruahman atanga chhutin zaa 13.81 in a pung.
Ram hmasawnna ruhrel siamna atan sum ruahman (capital expenditure) chu vbch 2982.44 a ni a, budget pum atanga chhutin zaa 17.46 a ni. Kum kal meka ruahman vbch. 2658.56 aiin zaa 12.18 in a sang tih a sawi.
“Revenue expenditure san chhan hi pension tangkhang chinfel sak a tam vangte, sawrkar hnathawk hlawh pung zel leh DA pung avangte, tui leh power hmangtu pung zelah sawrkar sum a chhuah tam avangte leh thildang vang a ni a. Hei bak hi chuan a inkhuahkhirh theih tak tak loh,” chief minister hian a ti.
Hetihrual hian captital expenditure lamah ram rotling an buatsaih nasat avangin centre atangin lawmman an dawng dawn a. Tun sawrkar kumah hian vbch. 350 vel an beisei mek tih a sawi. SASCI hnuaiah hna thawh that avangin sum hmuh belh tur an nei nual dawn a, chutihrualin SASCI hi pung awm lo tur ni mah se, loan a nih miau avangin ‘lei bat’ angin a kal tih sawiin, “Sawrkar lei bat tipungtu tur ni mah se, punna lawmawm lam a ni thung,” a ti.
Chief minister hian commited liabilities awm sa rulh zawh an tum anga, a awm tawh lohna turin hma an la dawn tih a sawi. “Commited lia
Sum ruahmanna thenkhat:
8 MLA Local Area Development Fund atan cheng vbch. 80 dah leh a ni
8 State-in hna pawimawh bik a kalpuina tur – State Priority Project atan vbch. 100 dah a ni.
8 Power & Electricity Department hnuaiah power leina atan vbch. 550 dah a nih bakah power subsidy atan vbch. 175 dah a ni
8 Sawrkar flagship programme, Bana Kaih (Handholding) scheme atan kum 2026- 2027 (BE) ah hian vbch. 350 ruahman a ni a, heta tanga vbch. 150 chu thlai thar leina turin Bana Kaih Scheme-ah a hrana dah a ni.
8 Autonomous District Council tana sum sem dan tur ruahman turin 3rd Mizoram State Finance Commission chu sawrkar kum tharah din tum a ni a. State Finance Commission hnathawhna atan nuai 100 dah a ni.
8 Art & Culture Department hnuaiah archaeological survey atan nuai 10 dah a ni a; music & art promote-na atan nuai 10 dah a ni. State chhunga NGO-te puihna atan nuai 150 ruahman a ni.
8 Mizoram Universal Healthcare Scheme (MUHCS) bill pekna turin vbch. 130 dah a ni a. Hei bakah hian subscribers, pensioners leh sawrkar hnathawkte contribution atang leh, corpus fund pung atangin vbch. 50 vel hman tur a awm bawk ang.
8 State Road Fund Board hman tura vbch. 40 leh Road Maintenance Cess atanga vbch. 43.25 dah bakah PWD hnuaiah Road Maintenance atan vbch. 30 dah a ni a; vbch 70 dang chu kawngpui pawimawh bik maintain-na atan dah that a ni. Road Maintenance atana 2026- 2027 a sum dah zawng zawng chu vbch. 183.25 a ni.
Mizoram budget 2026- 2027 pharh Commited liabilities awm tir loh tum
