Kum khat chhunga Mizoram sum hman tur ruahman, Budget Estimate 2026-2027 chu nimin khan finance changtu chief minister Pu Lalduhoma chuan House-ah a pharh a. Kum khat chhunga sum hman tur ruahman hi, charged expenditure nen vek a vaiin, cheng vaibelchhe 17,469.91 a ni.
Budget khaikhawmna hi a tawi thei ang berin hetiang hi a ni: Hmasawnna hna thawhna tur (Capital Expenditure) atan budget pumpui atanga 17.46% dah a ni a; sawrkar hnathawk hlawh leh sawrkar inrelbawlna (Revenue Expenditure) atan 82.54% dah a ni bawk.
Sawrkar hnathawkte hlawh leh sawrkar inenkawlna atan hian budget pumpui hmun ngaa thena hmun li aia tam dah a nih laiin, Mizoram mipui nuai 13 chuang chawikanna tur leh ram hmasawnna hna hrang hrang thawhna turin budget pumpui hmun ngaa thena hmun khat pawh tling lo chu D-A-H a ni ve tihna a ni.
Hetih rual hian, Budget-ah mipui chanpual a tlem tawh viau lai in, mipui sum hian khawih chingpen a la tawk zui hram thin a ni awm e.
Mizoram budget pharhtu chief minister hian, budget a pharh zawhah press conference a nei a, chutah chuan committed liability (thil lei bat emaw, sum awm si lova hna lo inthawhtir ang chi avanga ba siam chawp) a awm thin thu leh, a awm chhan chu politician-te vang a ni tih sawiin, work order pawh awm si lovin an duhsak zawngte ‘hei hi lo thawk rawh’ tih an ching, a ti. Hei bakah hian, sawrkar officer corrupt-te avangin committed liability hi a awm bawk tih a sawi a, “Keini chu kan khirh dawn a ni,” a ti.
Mizoram dinhmun hi chu kan hre tlang tawh a, thawhchhuah nei mang lo, central tax devolution leh thil thenkhata innghat ve ngawr ngawr kan ni a, tunah phei chuan Post-Devolution Revenue Deficit Grant leh Health Grant te tihtawp a ni tawh tih budget pharhtuin budget speech-ah a tarlang a. Kan state sum hnar lian ber pakhat (state’s own tax revenue) chu GST hi a ni deuh mai a, hei pawh hi ‘loop holes’ a la tam hle tih sawi thawm a awm a. A bak sum hnar dang (state’s own non-tax revenue) lamah hian tan kan lak nasat a ngai zual hle tih a lo lang bawk a. Sawrkar department hrang hrang atanga eng eng emaw fees etc. sawrkar sum bawma a luh dan hi endik a, system fel lo lai te a awm em tih enfiah runpui te hi neih a pawimawh viauin a rinawm. Hei bakah hian, state lottery pawh hi state sumhnar lian tak mai a nih avangin, mipui sum bawm a lo luh danah fel lote a awm palh em tih te enfiah fo a pawimawhin a rinawm.
Central lama kan sum hnar lian tak tak a lo tawp tak zel avang hian, mahnia thawhchhuah tam ve dan ngaihtuahna lamah kan insawrbing a tul ta hle a ni ber e.
Mizoram budget leh a behbawm…
