Food, Civil Supplies and Consumer Affairs minister B.Lalchhanzova chuan Mizoram buhthar lei tuma hmalak mek a nih thu a sawi a. Hei hi tunhma ațang tawha sawirik hlawh tawh, a taka la tihhlawhtlin theih loh a ni.
Hei bakah hian, supply minister-in buhfai chungchanga hmalakna thar a sawi zingah, retailer-te buhfai sem bang hralh an remtih tak loh avangin kum khat chhungin buhfai quintal 80000 vel, chu chu a pawisain cheng vaibelchhe 70, an hum thei dawn tih a tel bawk a. Buhfai sem dan chungchangah pawh, tunhmaa a buk tling lova mipuia pekchhuah țhin pawh dik taka mipuiin an chanpual tur an chan theih nan hma lak mek a nih thu te pawh a sawi a, retailer-te hlawh tur pawh siam țhat a nih tur thu a sawi bawk a. Supply minister hian hun rei lo te chhungin change țha tak tak a rawn thlentir nghal thei hi a fakawmin a chhinchhiahtlak hle a ni.
Mizoramin kum 50 chuang kan lo kalpui tawh, tun thlenga a tihngaihna kan la hriat loh chu, FCI atanga buhfai quota tikiam tura buh thar tihpun hi a ni. “Tun țum chu buh kan thar țha bawk a, FCI atanga kan quota hi MT 1000-in tlakhniamtir ang aw,” han tih hi kum 50 kal ta chhung khan vawikhat mah a awm lo.
Agriculture department a awm a, loneitute a enkawl ve reng tho. Kum tin environment suasam zawngin ramngaw kan hal kang dur dur thin a. A lehlamah, ‘environment humhalh a ngai, thing phun ang’ tiin sum leh pai, hun, tha leh zung kan seng leh țawk țawk a. India ram state zinga ram hring percentage nei țha ber hi, ram hring tichereu chak ber, ram ro chak ber kan ni leh lawi a. Chutih laiin, kum tina ramngaw țhiat lova buh chin theihna leilet siam tur ram awl hectare singnga vel kan neih thu sawi sawi chungin hman țangkai kan tum leh der lo lawi a. Kan khawsak phung hi chu a herh (weird) ve viau a ni.
Tunah hian buhhum lei tumin hma lak tur a lo ni ta a, Mizorama thingtlang loneitute hian buh thar tam tum ta se, lo an zauh a ngai ang a, ramngaw a chereu chak sauh ang a, chu chu ‘buhhum lei’ nen a engnge kan țhatpui zawk ang tih hi chhut tham fe a ni ngei ang.
Mahni state tharchhuah Buhhum lei theih chu duhthusam a ni e, mahse leileta siam theih ram awl hectare 50000 hi leileta chantir chungin ni se, ramngaw țhiat reng ringawt lo hian.
Retailer sem bãng hralh khap etc… vela hmalak pawh a țha e, chutih rualin a ram leilung fate eizawnna ngelnghet siam chunga thil kumhlun tur ngaihtuah zawnga kan kal deuh deuh hi tihmakmawh a ni.
Thingtlang lo kan siam tlut tlut a, ramngaw kan tichereu reng a, a lehlamah buhfai manah kan insengso tluk tluk reng bawk a… heti kumkhua tur hi chu kan ni lo maw le.
Mizoram buh thar
![](https://theaizawlpost.org/wp-content/uploads/tap_logo-min-large.jpg)