Tualte khaw pa JH Lalnunmawia chuan buh phur 1200 a thar a, hei hi tunlai tehkhawng ‘tin’ ang chuan tin 3600 a ni. Hei hi Mizoramah chuan kum khata mimal buh thar hnem ber anga ngaih theih a ni mai awm e. He buhthar lawmna hmanpuitu chief minister phei chuan, ‘hetiang hun hi kal khawmte hian kan la hmuh ka ring lo va, kan hmu leh pawhin ka ring chiah tawh lo’ a ti nghe nghe. Hetiang zat buh thar thei Mizo pa kan nei hi a chhuanawmin a lawmpuiawm takzet a ni.
Mizorama buh leh bal tharchhuah kawnga mawhphurtu leh loneitute enkawla buaipuitu agriculture & farmers welfare department official website-a tarlan a nih dan chuan, kum 2018-19, 2019-20 leh 2020-21, kum thum chhung khan MT 60,000 chuang theuh buh thar chhuah a ni a. Kum 2022-23 ah MT 58,836, kum 2023-24-ah MT 39,924 thar chhuah a ni bawk. 2023-24 chhunga buh thar hi a tlahniam ta duai a, hei hi sawhthing vang a nih a rinawm. 2024-25 report hi hriat hman a la ni lova, sawhthing chin uar a nih tak avang hian, kum hmasa ang vel tho a nih a rinawm.
Sawhthing chingtu an tam tak avangin buh hmun a zim a, buh thar a tlem a, sawhthing tharchhuah erawh a hma kum aiin a let engemawzatin a pung ve thung a. Buh hmun a zim tak avang leh buh thar a tlem tak avang hian environment tihchhiat a tlem phah sauh chuang lova, sawhthing chin uar a nih tak avangin, a hma aiin environment suasamna a nasa sawt zawkin a rinawm.
Chutih laiin, sawhthing chingtuten sum tam tak an lakluh theih phah a, a lawmawm em em rualin, FCI atanga buhfai kan lei erawh a kiam phah chuang lo a, environment erawh a chhiat phah sauh thung.
Kan rin pui ber buhfai thar chhuak tam tur hian beihpui kan thlak a pawimawh hle a, kan mamawh zatve tal kan tharchhuah theihna tur hian tuna WRC kan neih mek let tam tak hi leileta siam theih kan la nei a, sawhthing ringawt atchilh lo hian, ram tichhe tam lo zawng leh, tharchhuak tam zawk tur sia hma kan lak hi tihmakmawh a ni. Politics thila hamthatna tur ringawt ngaihtuah lova, ram leh hnam hamthatna tur tak tak kan buaipui hi a hun ve tawh hle a ni.
Mizoram buhbal thar dan…
