Kolasib district leh Mamit district chhungah leilet zau tak a awm a, chu chu chhuang takin ‘Mizoram Rice Bowl’ tia sawi a ni thin a; buh tam tak tharchhuah theihna a ni.
Hetih lai hian, abikin Kolasib district chhunga leilet zau tak takte hi a ram neituten enkawl lovin hnamdang an enkawl tir a. Leilet neituten an leilet enkawltute control chu sawi loh, a enkawltute zawkin a ram neitute zawk an control hlauh thin niin sawi a ni a. Kolasib district chhunga leilet neitu tam zawk hi chu Aizawl/Lunglei mi an ni. Mizoram Rice Bowl atanga tharchhuah buhte hi ram neitute zem-a lut lovin phai lamah a liam thla deuh vek zel tihna a ni.
Agriculture minister-in nimina thuthar thehdarhtute a kawmnaah, hetiang dinhmuna kan din avang hian, Mizoram sawrkar chuan dan anga ram neitute hmunhma humhalh nan Land Leasing Act 2022 a duang chhuak a ni, tiin a sawi a. He dan chhung Section 2 – Clause (g)-ah chuan ram hawhtu/hmangtu chu Schedule Tribe a ni ngei tur a ni a, Kuthnathawktu pawh Schedule Tribe hnuaia kuthnathawktu a ni bawk tur a ni, tih a ni.
Mizoram hian leilet atana siam theih ram awl hectare 50,000 chuang a nei mek a. Agriculture minister chuan tun sawrkar term chhung hian hectare 484-a zau leilet siam thar a nih thu a sawi a, chumi zau zawng chu Km 4.8 bial tihna a ni. Sawrkar term khat chhunga harsa taka leilet siam thar hi leilet siam theihna ram awl kan neih atanga 1% pawh a tling lo tihna a ni.
Hetianga leilet siam belh kan harsat em em laia a awmsa leilet zau tak mai hnamdang kuta kum kha leh chen kan awmtir thei kha a mak hle mai a, mipui hian ram leh hnam humhalhna rilru pu chunga kan ramte kan enkawl a pawimawh hle tih a lang a. Mahni ram chhung ngeiah pawh mahni ram humhalh nachang kan hre lo a a nih a, hnamdangin duhtawka min la control thei a nih chuan, inngaihtuah harh kan mamawh hle tihna a ni awm e.
Ei leh bara intodelh miah si lovin kan buhzem lian ber mai hnamdang kuta kan dah veng veng thei hi chu, inthin harh deuh chu kan ngai niin a lang. Mizo leilet chu Mizovin siam ngei se, a ram leilung faten a hlawkna chen ngei bawk ila.
Mizoram buhzem hnam dang kutah
