Tun hnaiah tlang ram state pakuate’n SASCI hnuaia scheme pakhata sum an hmuh tur zat puanzar a ni a, Mizoram chan tur a tlem em avangin sawi a hlawh hle.Tlangram state-te sum chan turState Sum (Vaibelchhe biin)
Arunachal Pradesh 4900
Himachal Pradesh 3920
Manipur 2400
Meghalaya 2070
Mizoram 100
Nagaland 3880
Sikkim 820
Tripura 3450
Uttarakhand 3460
He scheme hi Pride of Hills: Special Development Assistance for the Hill States under SASCI tih a ni a, 2026-27 chhunga tlang ram state-te sum hmuh tur puanzar niin, he scheme-ah hian cheng vaibelchhe 25,000 dah a ni a, Mizoram chan tur chu cheng vaibelchhe 100 a ni.
A chang tam ber tur Arunachal Pradesh-in cheng vaibelchhe 4900 an chang dawn a, a dawttu Himachal Pradesh chan tur chu cheng vaibelchhe 3920 a ni. Mizoram chan tur zat hi a tlem ber fal a, Mizoram tih lohva chang tlem ber Sikkim chan tur pawh cheng vaibelchhe 820 a ni.
Delhi-a official sang tak pakhat chuan Mizoram chan tur a tlem bik chhan a hriat loh thu leh mak a tih thu a sawi a, a tlem fal em em mai hi thil mak a tling, tiin The Aizawl Post a hrilh.
Tehfung a awm thu a sawi a, a tehfung atanga en chuan Mizoram chan tur hi hei aia tam tur a nih thu a sawi. A hriat chinah infrastructure bottleneck te, geographical bottleneck te, fiscal stress te chu tehfung a nih thu a sawi a, chungte en chuan Mizoram chu chang hnem tur a ni si, a ti a, Arunachal Pradesh leh Mizoram chu tehfung atanga teh chuan chang hnem tura ngaih a nih thu a sawi.
State hrang hrangte chan tur hi duh dan dana sem darh theih a nih loh thu a sawi a, chhan tha tak awm lovin tute emaw pek vak emaw tute emaw pek tlem bik emaw a theih loh thu a sawi a, Mizoramin a chan tlem chhan hi chhan tha tak a awm ngei tur thu a sawi bawk.
Arunachal Pradesh chief minister Prema Khandu chuan cheng vaibelchhe 4900 an chan dawn avanga prime minister leh finance minister te chunga a lawmthu social media lamah a post.