Mizoram chhimlamah thla hnih chhung Myanmar ramri an khar

Mizoram chhimlamah thla hnih
chhung Myanmar ramri an khar
Mizoram lam mi, Myanmar ram chhunga a tualthihna kaihhnawihah Lawngtlai district lama Myanmar nena inrina zawng zawng chu thla hnih chhung khar a ni anga, helaia tualchhung insumdawn tawnna pawh tihtawp a ni rih dawn tih Lawngtlai district bawrhsap Donny Lalruatsanga chuan a sawi.
Lawngtlai bawrhsap hian Lalramsanga, Lawngtlai AOC Venga cheng thihna avangin kawng hrang hrangin hma lak a ni a. Thilsual titute chu ‘foreigner’ ni mah se, hremna pek ngei an nih theihnan bawhzui a ni dawn tih a sawi.
Bawrhsap sawi danin, Lalramsanga leh a thiante hi February 11 khan Myanmar ram Salachhuah bungraw dah tura kalin, February 12 zan dar 9.00 atangin a chin hriat zui a ni ta loa, tun hi an thleng ta a ni. Central YLA, MTP leh LDPA nen thawhhona tha tak awmin, district administration nen an inrawntlan reng a. Thihna hial thleng chu pawi a tih thu sawiin, thla hnih chhung atan ramri khar a ni dawn tih a sawi a ni.
Lawngtlai SP PC Lalchunglura sawi danin, February 15 chawhnu dar 3.00 velah Salachhuah leh Chhimtuipui infinnaah Lalramsanga ruang hmuh a ni a. Police-ah FIR thehluh niin, case ziahluh a ni a, Phura Police Station-ah transfer a ni. Chak taka chhui a ni dawn, tiin, a taksaa hliam hnuhma atanga a lan danin tualthah thubuai ziahluh a ni a, chumi ang chuan chhui a ni dawn a, pawikhawihtute chhuichhuaha hremna pe tura hma lak tum a ni tih a sawi.
Lawngtlai district bawrhsap Donny Lalruatsanga hian Thawhtanni vek khan hriattirna tichhuakin, Lawngtlai district chhung ramria inkalpawhna zawng zawng thu leh awm hma khar vek a ni a. Phalna neilo ramdang mi, mi tumah ramri pela an district-a luh a khap tih a sawi.
‘Ramri kana zin emaw sumdawn bungraw lak leh thawnchhuah khap tlat a ni a. Lawngtlai district lirthei bakah district dang lirthei a huam a ni,’ a ti. Thupek zawm lo chu Section 223 BNS 2023 hmanga hrem an ni dawn, tiin, he thupek hian thu leh awm hma chu chhuah a nih atanga thla hnih chhung a huam dawn tih a sawi a ni.