Nimin khan health minister Lalrinpuii chuan Food Safety lam hotute kovin eitur hrisel leh thianghlim chhawp chhuah kawnga hmalak dan tur a sawipui a. Tuna Mobile Food Testing Laboratory neih mek chu mipuite’n tangkai zawka an hman theih nan hma la turin thawktute a chah a.
Food Safety hotute chuan thawktu indaihlohna avang leh testing laboratory changtlung neih loh avangin hmalak a harsat thu an sawi a. Tun hnaia FSSAI ranking-a Mizoram hniam chhan pawh thawktu neih tlem vang leh chhan dang vang a nih thu an sawi bawk.
Food Safety and Standards Authority of India (FSSAI) hian 2019 atang khan kum tin State Food Safety Index a tichhuak thin a. SFSI hnuhnung ber 6th State Food Safety Index (2023-24) ah khan India rama State leh UT 36 zingah Mizoram chu 35-na a ni a, Lakshadweep chu 36-na a ni. SFSI hmasa ber 2019-20-ah pawh khan Mizoram chu “8 smaller state” ranking-ah a mawngphah kan lo ni tawh bawk.
Tuna food safety index hnuhnung berah hian Mizoram score chu 11 a ni a, kan thenawm state (NE state) bikah, Manipur-21; Arunachal-27; Sikkim-30.5; Meghalaya-33; Tripura-36; Assam-38.5; Nagaland-44.25 te an ni. India rama score sang ber state chu Kerala (73.74) a ni a, a dawttu chu Tamil Nadu (67) a ni. Full mark hi 100 a ni.
Pawn lam lan dan atanga han en thuak hi chuan, Mizoram khawpui leh thingtlang khuate hi kan thenawm state-te ai chuan kan fai hmel viau mai a, mahse eitur hrisel leh thianghlim chhawpchhuah kawngah hian kan lo hniam hle mai tih chu State Food Safety Index atangin a lo chiang ta a. Kan Food Safety hotuten ‘thawktu indaihlohna avang leh testing laboratory changtlung neih loh vang’ tia an sawi hi a tehkhawng (parameters & weightage) atangin a dik theihna chin pawh a awm maithei, mahse FSSAI mit ni lo, a ram leilung fate ngei ngei mit atanga han teh pawh hian, eitur kan sawngbawl dan leh kan chhawpchhuah dan hi chu a thianghlim lovin a hrisel lo tih chu khaw kar kawnglak hotel atang ringawt pawh hian Mizoram rawn tlawhtu tourist tam tak hi chuan an hmu thiam nghal ngeiin a rinawm.
Chhuanlam tur zawng lovin, kan diklohna leh insiamthat kan ngaihna lai hi tihdik tuma kan thawh zar zar theih zel hi a pawimawh ber chu a ni.
Mizoram Food Safety hi…
