Zodintluanga
Mizo thalaite infiamna lama kan tuihalna hi kan hun hma lam daih tawhah khan a lian em em a. A bik takin football ground tha kha a ni zual a. Vawiin ni thlengin a la ni zel. 2003-a Mizoramin national football tournament U 16 kan thlen tum phei kha chuan kha tih laia CM Pu Zoramthanga khualliana lammual a kal pawh thalai hovin ‘khelmual tha, khelmual tha’ tiin an aukhum a nih kha. Ani khan khelmual tha tak pek a han tiam a. Kut an beng dur dur a. Mahse, a hun tawp thleng khan engmah tihzui kha a awm ta lova.
2008 December-ah Congress-in sawrkarna kan han chang a. Sports deptt enkawl tura min tih hlim hlawl khan MFA hotu Pu Tuikhuahthanga leh Pu Vanlalngheta te ka inah lo lengin khelmual tha neih theih dan tur kan sawiho a. Grass tha a awm loh chuan hmasawn a har, ground chhe deuhah kan naute an practice a. Phaiah ground thaah mi chuan an zir a. Hmasawn turin kan nauten a thaah an zir ve a ngai a ni an rawn ti a. Kan ram sik leh sa ngaihtuahin furah ruahtui tam lutuk avangin kan ground kan dai kawi vek a. |halah kan pal khu leh rum rum a. Chuvangin artificial ground lam hawi mai ila kan ti ta a ni. Anni pawh chu internet lama hetiang siam thei lo dap turin ka hrilh a.
2009 Kunthar veleh khan an lokal leh a. India ramah artificial ground siam thei company pakhat chauh an hmuh thu leh ground pawh pakhat chauh a la awm thu an rawn thlen leh a. Ngaihtuah zui turin kan dah a. Thil thar tur a ni a. Tihsual pawh kan hlau. India rama artificial ground an siam chhun lah chu Goa lamah daih mai a lo ni a. En loh chuan ka ti ngam mai lo. Hemi hnu lawk hian IT deptt lamah Goa zinna remchang a lo awm ta hlauh mai a. Pu TKa nen chuan grass en pah turin kan zuk zin ta a ni.
Goa-ah hian 14th February 2009 ah ground siamtu company te kovin kan en a. Keimahni ngawta thutlukna siam lovin Robert Lalthlamuana, khawzawl football player, Goa Churchill brothers a khel mek chu kan ko bawk a. A hnenah chuan, hetiang ground hi Mizoramah siam ve kan duh a. In khelhna atan hian a tha ngei em tiin kan zawt a ni. Roberta chuan tha a tih thu sawiin, Mizoramah chuan hetiang bak hi chu a harsa rih ang a ti ve bawk a. Kan haw leh a. Sawrkarah sum a awm mai loh avangin 2011 ah Aizawl lammualah artificial turf Mizorama hmasa ber chu kan phah thei ta a. Mipui pawhin an lawm hle a nih kha. A kum leh 2012 ah Lunglei |huamluaia mualah kan phah zui leh a. Chubakah northeast games a hman hman turin RG stadium, Mualpuiah kan phah leh zui ta a ni. Chutiang chuan ka hun laiin Champhai chhangphut field leh Zotlang field, Kolasib ah te kan phah zui thei ta a.
Mizoram Football Association nen kan thawhhona a tha a, kan grass phah chuan awmzia a nei hle bawk. 2014-ah semi final pawh kan la thlen ngai lohna, India ram state te inelna sang ber Santosh Trophy-ah kan champion ta nghal bawk. Vawiin ni thlenga kan la champion zui leh lo erawh rilru a na deuh.
Mahse, santosh trophy kan champion atang khan kan state players te vai ram lamin an rawn hmelhriat tan ta tak tak a. Kan tlangvalte phai ram club thaah hlawh tam tak tak neiin an khel zui ta huai huai a ni. Vawiin ni thlengin India team foreign-a an zin chuan Mizo tlangval hmel hmuh tur an awm ta zel mai te hi a nuam a. Vawiin nia football vanga lar Jeje Lalpekhlua te MLA hial an han ni chho ta te, India ram player tha bera (player of the year) Lunglei tlangval Lallianzuala Chhangte te an rawn ni chho te hi lawmawm ka ti takzet.
State rethei kan ni a. Infrastructure neih thatah mi state phak lo mah ila kan thalaite tum ruhna te, an huaisenna te leh theihna hian Mizoram hi a la chawisang zel ang tih ka beisei tlat a ni.