Mizoram hi CSR dawng
tlem ber state kan ni thin
– Chief minister
Mizoram chu corporate social responsibility (CSR) dawng tlem ber state kan ni reng thin a, a chhan chu CSR implementing agency kan neih tlem bik vang a ni tih chief minister Lalduhoma chuan a sawi.
Mizoram CSR Cell leh Confederation of Indian Industry tangdunin ni thum awh NGO-te tana CSR dil dan leh a buaipui dan inzirtirna an buatsaih Zirtawpnia an khar tak hmanpuitu chief minister chuan India rama company-ten dan anga CSR thehchhuah tur an ngah a, a kumtela a pun zel laiin, Mizoram chu a dawng tlem ber state a ni thin tih a sawi.
CSR fund hmang hian ram hmasawnna hna, lian leh pawimawh tak tak a thawh theih a, Serchhip Hospital building sakna atan pawh vaibelchhe 21 an hmu tih sawiin, state dang aia kan hnufual chhan chu CSR implementing agency kan neih tlem bik vang a ni deuh ber tih a sawi. Implementing agency tam zawk neih theihnana hma la turin Chief Minister Office-ah CSR Cell an din ta tih a sawi a ni.
He programme chhimtu, society, NGO leh hospital-ten registered agency nih theih ngei tum tura chahin, “CSR Cell hi nangmahni tanpuitu tura din a ni. In inberawn zel thin dawn nia. Nakinah project in thehluh hunah chief minister DO letter in mamawh hun a la awm ang. Chu’ng hunah chuan min hrilh thin ula, kan lo pui ang che u. In hlawhtlin chuan in society-in a hlawkpui anga, thalai tan hna in siam belh anga, ramin kan hlawkpui dawn a ni,” chief minister hian a ti.
Mizoram hi CSR dawng tlem ber state kan ni thin – Chief minister
