Mizoram hmeichhe football champion:
Hnahthial District Women’s Team
Thawhtanni khan Kolasib Sports Stadium-ah MFA Inter-District Senior Women’s Football Championship 2025-26 khelh zawh niin, final-a an khingpui Mamit DFA 2-1-a hnehtu Hnahthial District Football Association hmeichhe team an champion.
Nimin, hawhehni khan champion team hian an district khawpui Hnahthial lutin, district mipuiin an lo hmuak a, Bazar kawnah a lawmna leh hmuahna hun tawi hman a ni.
Football thiam khua tia sawi thin Hnahthial hian mipa football-ah hniam lam an pan mek laiin an nulate erawh Mizoram champion an ni thei a; hockey uar leh khel rei khua an nih angin hockey bikah phei chuan a zawna vawi thum champion thei an ni!
Kolasib District Football Association (KDFA)-in mittlung taka an thlen MFA Inter-District Senior Women’s Football Championship final-ah hian Hnahthial nulate’n first half chhungin goal hnih an thun hman a; an goal hmasa zawk hi minute 23-naa Lalrinmawii tihluh niin, chawlhlawk hma minute li la awmah C. Lalremruati a khung belh a, half time-ah Hnahthial hian sihnih faiin hma an hruai phawt.
Second half minute 73-ah penalty atangin Mamit lamin an siphurh pakhat zawk an sut then a, Lalfakzuali goal bak khawthlang nulate’n goal dang an thun belh zawh loh avangin Hnahthial an champion ta a ni.
Tournament award hrang hrang semah pawh champion team hian an hui fai vek a; Hnahthial DFA hi fairplay award dawngtu niin, tournament chhunga Hnahthial district hmeichhe football team tana goal nga ve ve thun tling C. Lalremruati leh Lalrinmawiite chu top scorer niin, best player atana thlanchhuah pawh Hnahthial tar player C. Lalremruati a ni.
MFA Inter District Senior Women’s Football Championship kharna inkhawm hi November 3, 2025, Thawhtanni khan Deputy Speaker leh Kolasib bialtu MLA ni bawk Lalfamkima chuan Kolasib Sports Stadium-ah khuallian niin a hmanpui.
He hunah hian khuallian chuan thu sawiin, Kolasib Sports Stadium-in enkawltu mumal a neih theihna’na KDFA kuta sorkarin a hlan chu a lawmpui thu leh tangkai lehzuala hman a nih theihna’n leh stadium pawh changtlung leh tha zawka an enkawl theih a duh thu a sawi
Bialtu MLA hian Mizo infiammite chu infiamna hi eizawnna tling a nihzia hretute an ni tawh tih sawi bawkin, tun aia intihhmuh sauh sauh a tul thu leh Mizoram pawn thleng pawha khel thei tura tan la sauh sauh tura fuihin, Thawhtannia final match khel turte chu mawi tak leh theihtawp chhuaha khel turin a fuih.
MFA Inter-District Senior Women’s Football Championship hi October ni 28 khan Kolasib Sports Stadium-a khelh tan niin, Mizoram district 11 atangin team an intir vek thei a; tarlan tak angin, Thawhtanni khan Mamit District leh Hnahthial District nulate’n final match khelin, 2-1 hnehna nen Hnahthial District-in chhi lamah nomawi an hawpui ta a ni.
Mizoram hmeichhe football champion: Hnahthial District Women’s Team
