Mizoram hockey tana chechhuak thin Miss Pari

Durtlang Hockey Association (DHA) Academy naupangte’n practice ground atana an hman thin M. Suaka Veng Ground, Durtlanga mi chu Mizoram hockey tana thawhhlawk kumkhua Miss Lalrampari (retired NIS coach) chuan Durtlang Local Council-te hriatpuinain JCB hmangin a cheithat sak dawn!
DHA Academy naupangte’na practice-na atana an hman khelmual hi a zimin, a rualrem lo em em a, side drain a awm loh avangin ruahsur apiangin tuihawkin chirh leh hnawmhnawk tamtak a lenlut thin a, chu’ngte chu naupangte leh an zirtirtu (coach)-te’n an theih ang angin an thianfai fo thin a ni.
Miss Pari hian DHA Academy naupangte harsatna leh rualawhnate hi hriatpuiin ama sum sengin an ground chu a remchan dan ang ang leh a theih ang angin a nawr mam leh zauh te, side drain siamte thlengin a tihsak dawn a ni.
Miss Pari hi Mizo hmeichhe zinga NIS coach hmasa ber niin, Mizorama SAI Hockey Training Centre a din theihna tura sulsutu leh thawhhlawk berte zinga mi a nih bakah Thenzawl SAI Hockey Academy-a coach hmasa ber a ni tel bawk.
Tunah hian coach a nihna atangin chawl (retired) tawh mah se hockey game tana a inpekna leh thahnemngaihna chu a la chawlhsan thei chuang lo a, Mizorama hockey game hmasawnna atan theihtawp a la chhuah chhunzawm zel a ni.
Tunah hian Aizawl District Hockey Association (ADHA) leh Durtlang Hockey Association (DHA)-ahte president a ni mek bawk.
Miss Pari chuan, “Mizote’n game dang zawng aia talent kan neih thatna game, mi tam takin ei hmuhna atana an hman mek leh railways-ah ngawt pawh mi 13 lai an thawh phahna, Olympian meuh kan neihna leh nikum, 2024 chhung ringawt pawha Women’s Asian Trophy-a champion team India tana player langsar leh pawimawh (Lalremsiami) kan thawh theihna leh Women’s Hockey Junior Asia Cup-a champion, India tana player pawimawh pahnih lai mai (Lalrinpuii Pachuau leh Lalthantluangi)-te kan thawh theina game hockey hi Mizoramah hian a fahrah rei ta lutuk a ni,” a ti.
Mizo hockey coach ngaihsan hlawh berte zinga mi Pari hian sawizawmin, “Hockey ram ropui, world ranking-a hmeichhia leh mipa top ten-a lang phak India team-ah meuh pawh player 12 lai mai kan neih theihna leh tun dinhmuna player pawimawh pathum lai kan thawh theihna game hockey hian ngaihsak mai pawh ni lo duhsak hi a phu hle a ni,” a ti bawk.
Mizoram hockey tana a thahnemngaihna hi luangliampui chhunzawm zelin, “Aizawl khawpui chhunga game dang zawng zawngte’n veng tina ground tha tak tak an neih vek theih laia hockey ground pakhat pawh hockey-in an nei ve thei lo chu hriatthiam har a tih thu a sawi.
A la duhtawk mai lo a, tuna AR ram chhuahsan tak, AR cinema hall hmun hluiah ngei hian national level tournament khelhna tlak hockey stadium sak ni se tiin rawtna a siam a; chutah ngei chuan an naute’n national competition khel se a ti ngawih ngawih a; India aiawha khel tur zawnna (selection trial) hmachhawn tura rela thui tak tak leh rei tak tak hah hnepa an thang hnua phaituala an naute inkhel thinte chu tawp ve tawh se a duh a, a suangtuahna leh duhthusam chu a mit men lai ngeia hmuh hman a thlahlel tih a tarlang tel.
Mizo hockey coach hmasaber Miss Pari chuan a duhdan hi Mizoram sawrkarin a tipuitling thei a nih ngat chuan Mizoram hockey-ah hmasawnna nasa tak leh ropui tak a thleng ngei dawn niin a ngai nghet hmiah a, chu chu sawrkar hmathlir ropui tak ‘Vision 2036 Olympics’ tihhlawhtlina tura thil tul leh pawimawh ber a nih thu uar takin Post Post a hrilh.