Mizoram IMR 4 a ni mek
A hniam ber zingah a tel
Nausen dama piang sangkhat zela a thi zat chhuta India rama nausen thi tlemna ber zingah Mizoram a tel a, Mizoram IMR hi 4 a ni.
Registrar General of India-in a tih chhuah thar ber, Sample Registration System (SRS) Bulletin, kumin May-a tihchhuahah India ram state leh union territory zingah Mizorama nausen thihna rate, infant mortality rate (IMR) chu 4 niin, India ramah hniam ber nihna hauh state pathum zingah a tel a. Manipur leh Sikkim pawh 4 tho an ni.
IMR hi nausen dama piang sang khat zela nausen kum khat hnuailam thi zat (infant deaths per thousand live births) tihna niin, IMR 4 hi a tha hle a, India ram pum IMR chu 27 a ni. Tun tum SRS data hi 2021 data hmanga siam a ni.
IMR hniam tur hian health system pumpui a that a ngaih avangin mithiamte chuan IMR hniam hi khawvel pumah hriselna lam kawnga hma kan sawn leh sawn loh tehna pawimawh ber zingah an hmang thin tih Health department hotute chuan an sawi.
Sample Registration System report hi Census department chuan kumtin report a siam thin a. State pakhat hi bial engemawzatah then hrangin, bial khatah pawh sample lakna tur chhinchhiah vek thin a ni. Chutianga sample atanga an survey report chu kumtin an tichhuak thin. Rokhawlhna avangin kumtin tihchhuah theih loh chang an nei thin a; 2019 IMR data chu October 2021-ah tichhuakin, 2020 data chu May 2022-ah an tichhuak a ni. 2021 data hi kumin May-ah an tichhuak thei chauh a, SRS Bulletin thar ber a nih angin sawrkar laipuiin ruahmanna leh hmalakna tur a siam dawnah a tehfung hman tur a ni rih thung dawn tih an sawi a ni.
Hetihlai hian Census department compile ni lo, Health department-in report a neihah sawrkar kum kalta, 2024-2025 ah pawh Mizoram chu India ramah IMR hniam pawl tak a ni leh tho nia sawi a ni.
Health minister Lalrinpuii chuan state lian zawk leh changtlung zawk daihte kara infant mortality rate-a Mizoramin pakhatna dinhmun a hauh thei chu lawmawm a tih thu a sawi a. “Hei hian hriselna kawngah Mizoram chuan hma a sawn zel tih a entir a ni,” a ti. Hemi atana rim taka thawktu Health department bakah a programme anga enkawltu National Health Mission Mizoram leh RCH Programme, line department – Social Welfare Women & Child Development, School Education, Rural Developement, PHE leh a dangte, IMR hniam theihna atana hmalatute chungah an lawm tih a sawi bawk.
Mizoram IMR 4 a ni mek A hniam ber zingah a tel
