Serchhip District Jail-a dah, a tan hun hmang zo tawh Vietnamese pa, Dahn Niang chu December 18 khan chhuakin Thutak Nunpuitu Team (TNT) Muanna Vengah dahluh a ni. NewDelhi-a Vietnam Embassy hnena hlan a nih hma chuan social activist Vanramchhuangi chu a guardian a ni ang.
Dahn Niang hi taksa leh rilru lama rualbanlo niin, Mizoram hi Myanmar lam atanga rawn tei lut nia hriat a ni a. March 28 khan Champhai district Thekte ah luh a tum a, Covid leng inkharkhip lai a nih avang leh tawng an inhriattawn loh avangin Village Level Task Force (VLTF) ten luh an phalsak lo ni. Khuangthing VLTF duty ten lo hmu lehin thawmhnaw leh eitur an pe a, an ramri thleng an thlah. April 1 khan East Lungdar a thleng a, VLTF ten ni 14 chhung khung hrangin an lo enkawl a, hemi hnu hian Serchhip Police-in an la a ni.
‘Foreigner case’ in Serchhip District Jail-a dah luh a ni a. 2021 July 29 khan ‘simple imprisonment’ a ‘convict’ niin, kum 2 tang tur leh Rs. 10000 chawi tura tih a ni. A nungchang that vangin a tan hun chhung tih tawi sak niin 2022 June 23 khan a chhuak thei a, kalna tur a neih chuan loh avangin jail-ah hian enkawl zui a ni.
A tirah amah hi eng hnam nge tih hriat a ni mai loa, Mizoram Police, Jail hotute leh court lam hotute pawhin theihtawpin an buaipui a. South East Asia ram hrang hranga Mizo missionary-te an be kual a, chu’ng atang chuan Vietnamese niin an hria a, Mizoram Home department-in sawrkar laipuia Ministry of External Affairs (MEA) hrilhhria in, an ni hian Vietnam Embassy an hrilh chhawng a. Hun rei tak hnuah Dhan Niang hi an ram mi leh sa ngei a ni tih chhuichhuakin Vietnam thingtlang khaw pakhata cheng a ni. Vietnam passport pawh an siamsak tawh a. Embassy lamin an lak theih hunah an ram lamah a haw thei ang.
Niang buaipui hian civil society lam atangin Human Rights and Law Network Mizoram pawhin sawrkar hmalakna puibawmin MEA lam an lo bepawp a, jail tan hun hmang zo tawh, awmna neih loh vanga jail-a awm reng chu rorelna dik lo leh tha lo (injustice) a nih theih avangin Centre for Environment and Social Justice (CESJ) chuan a awmna tur an dap sak a, mimal tlawmngaia enkawl lailawk thei pawh an awm laiin, TNT hotuten inhawng taka an lo tuamhlawm theih avangin CESJ hian lawmawm a tih thu a sawi a ni.
Mizoram jail-a tang Vietnamese TNT lamah enkawl zui rih dawn
