Minister Lalnghinglova Hmar chuan Chennai-a investor kalkhawm hmaah Mizoramah thlai leh mau hmanga sumdawnna lamah investor-te chu an lam hawi turin a sawm.
Ministry of Development of North Eastern Region (DoNER) buatsaih North East Investors Summit chu Nilaini tlai khan Chennai-ah neih a ni a. LESDE minister Lalnghinglova hmar hian Mizoramin tunhnaiah thlai a thar thahnem dawn a, a bikin sawrkarin lei a intiam tawhna – sawhthing, hmarcha, aieng leh hmunphiah lei tur a awm dawn, tiin, a hlawma lei duh tan Mizoram sawrkarin kawng a hawng zau zel dawn tih a sawi a. Mizoram sawrkar chuan kuthnathawktute banah a kai tih a sawi.
Mizorama sawhthing chi hnih – Thingpui leh Thinglaidum bakah Mizo hmarcha chuan GI tag an nei tawh a, hmundanga hralh chhuah tlak an ni tih a sawi. A hralhna kawnga thawhho bakah a sawngbawlna tur din tura thawhpuiah investor liante chu a sawm a ni.
Mizoramah mau a tha duh em em tih minister hian sawiin, tun aia tangkai zawka sawngbawl tura thawhho puiah industry neitute a sawm bawk.
DoNER minister Jyotiraditya Scindia chuan India hmarchhak chu mau tamna leh that duhna a nih angin a hmuna kalchilh a, zirchiang a, hmang tangkai turin industry neitute a chah bakah hmarchhak chu sports lama theihna nei sang tak a ni a. India-in 2036 Olympics thlen a tumna kawngah hmarchhak state-ten tha an thawh theih dan chu tun atanga infiammite inbuatsaih tan a ni tih a sawi. Chumi kawngah chuan private investor-te thawhpuiah a sawm. Mizo thalaite state pawna hnathawkin an chhuak nasa a, a bikin hospitality service lamah hnuhma an nei tha tih kalkhawmte a hrilh a. Hei hi lianthama kalpui turin investor tha mamawh a ni tih a sawi a ni.
Tamil Nadu state-a investor-te chu a taka hmar chhak state tlawh a, a theihna sang tak hai chhuah kawnga pui turin DoNER minister hian a sawm a ni.
North East Investors Summit-ah hian hmarchhak state hrang hrang aiawhten an theihna pholangin an state-a investment kalpui turin investor-te an sawm a. Mizoram sawrkar aiawhin Agriculture leh Horticulture special secretary Ramdinliani’n presentation a pe a, Commerce & Industries director Maria CT Zuali bakah official dangte an tel. He hunah DoNER ministry hotute leh Federation of Indian Chambers of Commerce & Industry aiawhten thu an sawi a ni.
Mizoram lam hawi turin investor-te sawm
