Information & communication technology changtu minister Dr Vanlalthlana chuan lehkha hmanga file system kalpui mek thlakna tur eOffice kalpui tan a nih thu leh sawrkar department website tha zawka siam hna thawh mek a nih chungchang nimin khan thuthar thehdarhtute hmaah a sawifiah a.
Mizorama eOffice kalpui theih a ni ve ta hi hmasawnna mel lung thar pawimawh tak a ni kan ti thei ang. A changtu minister-in a sawi anga file bo awm thei tawh lo tur te, file ken kual a ngai tawh lo tur leh, file ken kual avanga confidentiality him lo thei tur tun china a lo him zawk tawh tur te, lehkhapuan hman tlem a nih tawh dawn avanga sawrkar sum tam tak hum theih a ni turte hi hmasawnna lawmawm tak a ni kan ti lo thei lo vang.
Kan hriat angin India sawrkar chuan kum sawm hma lam atang tawh khan eOffice hi state sawrkar tinin kalpui turin National e-Governance Programme hnuaiah ruahmanna a lo siam tawh a. Hemi denchhen hian kum 2020 khan “workshop on e-Office for North East States” chu webinar kaltlangin buatsaih a ni a, Mizoram IT minister leh a hote pawh an tel ve a nih kha.
Khami hnu khan eOffice kalpui tura hmalakna a awm zui lo nge, nimina ICT minister-in a sawi dan chuan, January 2024 atang khan hma lak tan a ni, a ti a. A bul tanna atan Secreteriat tih hmasak a, chumi zawha Directorate leh District Office-ah te kalpui tura ruahman ni, a ti. Eng pawh ni se, hetia eOffice kalpui tan a ni thei ta hi hmasawnna lawmawm tak chu a ni phawt mai.
Department website chungchangah hian, rin ang leh beisei angin hmasawnna a chak lo hle a. Department tam takin tha taka an website an vil theih laiin, department thenkhat erawhin a nihna tur angin an la vil thei lo niin a lang. He lamah pawh hian mipui chhawr tangkai theih tura website vil ngun deuh tura intuaithar leh kan mamawh niin a lang bawk.
eOffice-in a ken tel chu heng – rang zawk, langtlang zawk leh fel zawka mipuiin sawrkar service an lo dawn theihna a ni. eOffice hi a nih tur anga a kal theih phawt chuan, hmasawnna hi a ‘zuang’ ngeiin a rinawm.
Mizoram leh eOffice
