Parliament Session kal meka Union Budget sawihonaah tun hnai khan Mizoram bialtu MP (RS) Pu K. Vanlalvena chuan, North East state zingah Ministry of Road Transport and Highway hnuaia motor kawngpui siamna tur budget chang tam ber dawttu Mizoram a ni chu lawmawm a tih thu a sawi a.
NE state 8 zingah hian Assam-in cheng vbch 34,198 (35.12%) changin a chang tam ber a, a dawttu Mizoramin cheng vbch 16,606 (17.02%) a chang bawk a. Assam leh Mizoram hian NE state tana motor kawngpui siamna tur budget pumpui (97,372 Cr) atanga 52.17% an chang a, a bak 47.83% chu NE state 6 ten an insem ve a ni.
Tun dinhmunah hian Mizoramin National Highway hrang hrang a neih thui zawng belhkhawm hi kilometers 1,499 (FY-2023; Statista) a ni a. Chu mi awmzia chu, National Highway thui zawng hian Mizoram hi ramri chin zar zarah vet kual ta se, vawi hnih leh a chanve aia tam hret a vet chhuak thei dawn tihna a ni. Tuna kawngpui siam mek leh siam turte hi zawhfel a nih hunah phei chuan, National Highway kan nei changtlung ve dawn ta hle tihna a ni a. Mizoram dung leh vang, a khawi lai mai pawh hi darkar tlemte chhungin kan thleng ve zung zung thei tawh dawn tihna a ni a, chu chuan hmasawnna hi a zuantir ngei ang.
Hetih lai hian, a pawimawh ber chu, hmasawnna ruhrel din a nih laiin quality tha awm tura lo vil ngun peih hi a ni. Tuna National Highway thar kan neih mekte hian belhchian a dawl lo chho viau mai niin tunhnaiah hian a lang a. Kawngpui siam a nih lai hian, a chhawrtu tur ber, a ram leilung fate hian, hnathawh dan hi uluk taka kan vilpui ve ran a pawimawh a, chu chu tunah hian kan tlakchham tak pakhat a ni mek niin a lang. A dawt lehah chuan a enkawl zui lam hi a ni. Hmasawnna ruhrel tha tak tak kan neihte hi a enkawl zui lamah kan sang fahran lo, engmah hi a tha rei tak tak ngai lo a tih theih awm e. A bikin kan state road-te hi fur khat pawh daih mang lo a ni nual thin a, chuta chhapah, a enkawl zui (maintenance) lamah kan zam a tha tawk lo em em zel bawk.
Motor kawngpui siamna budget thahnem tak kan chang hi a lawmawm rualin, a daih rei turin kawngpui siam a nih laiin quality tha tak a awm theih nana lo vilpui lamah taimak kan lo chhuah leh si loh chuan, cheng tam tak sengin kawngpui tha vak lo kan nei palh ang tih a hlauhawm a ni.
Mizoram leh kawngpui chhiarkawp…
