Mizoram loneitute tharchhuah
hectare khatah ton 1.73 chauh
Chawhrualin India ramah hactare khatah loneituten ton 2.5 – 3 an thar laiin, Mizoramah chuan hectare khatah ton 1.73 chauh loneituten an thar chhuak.
Bharat Rural Livelihoods Foundation (BRLF), Mizoram sawrkar Rural Development department, United Nations Development Programme leh Mizoram University tangho huaihawtin Thawhlehni khan “Roundtable Consultation on Enabling Sustainable Livelihoods in Mizoram” tih thupui hmangin, ram leilung tichhe lo zawnga hmasawnna tluantling kalpui dan leh thingtlangmite hmasawnna tur an sawiho.
Data-a a lan danin, tunah Mizoramah lo neia eizawng mipui 60-65% an awm na in, thil thar chhuahin India ram dang a la pha lo hle a; chawhrualin India ramah hectare khatah loneituten ton 2.5-3 an thar laiin, Mizoramah chuan hectare khatah ton 1.73 an thar chhuak. Loneitute thar chhuah, forestry leh fisheries belhkhawm chu state gross value-added ah 27% niin, service sector atangin 46% a ni thung.
Mizorama mau, India rama mau awm zawng zawng zinga zaa 14 tangkai zawka hman a nih theih dan tur, industry changtlung zawk din dan tur, non- timber forest products, agroecological horticulture leh integrated farming system kalpui theih dan leh tunlai thiamna GIS hman tangkai theih dan bakah tlangrama loneitute harsatna – tuihna tlem tial tial, market lama harsatna leh sik leh sa inthlakin a nghawng harsatna chungchang sawi a ni.
Hmanpuitu RD minister Prof Lalnilawma chuan tun hun amite mai ni lo, thangthar lo la awm zel turte tan rah duhawm tak a chhuah ngei a beisei tih a sawi a. Eizawnna tluantling, tlo leh kumhlun awm thei tur chuan sawrkar, mimal, pawl leh khawtlang tanrual a pawimawh tih a sawi.
Hmasawnna hnaa ruahmanna siamtute chu thingtlangmi leh kuthnathawktute an thlir danah sawrkar scheme chhawrtu anga thlir satliah mai loa, hna thawhpuitu an ni tih hrereng turin a chah a; thingtlangmi leh kuthnathawktute thawhpui loh chuan tunlai thiamna, degree sang tak tak leh technology tha tak takin awmzia tak tak a nei loa, tualchher thiamna (indigenous skills & knowledge) chawinun zel a pawimawh tih a sawi. Chutih rualin khawtlang leh mipui pawh sawrkar hmalakna tawiawm tha turin a sawm a a ni.
BRLF hi sawrkar laipui Ministry of Rural Development hnuaia awm niin, India ram state 11-ah hna an thawk mek a. A bikin thingtlangmi leh tribal-ten sawrkar laipui hmalakna hrang hrang zar an zo ve theihnan an thawk thin a. BRLF leh RD department hian kum 3 chhung rural livelihood sector-a thawk ho turin kumin May khan MoU an lo ziahhnan tawh a ni.
Mizoram loneitute tharchhuah hectare khatah ton 1.73 chauh
