Mizoram mi lachhuak kimah ngai
Manipur atangin raltlan 4400+
Manipur-a buaina chhuak avanga Imphal-a tangkhang Mizoram mi chu lachhuak kimah state sawrkar a inngai a. Sawrkar ruahman leh mahnia hma lo la mi 300 chuangin an chhuahsan. Hemi chhung vel tho hian Manipur atangin sahimna zawnga Mizorama lut mi 4400 chuang an awm bawk.
Ningani khan Home minister Lalchamliana hoin sawrkar hotuten Manipur buai vanga Mizoram mi Imphal leh a chhehvela tangkhangte sawrkarin a lak chhuah dan thlirho a ni a. Home minister chuan Manipur buaina avanga Mizoram mi tangkhang hriat theih chin chu lak chhuah vek an ni tawh tih sawiin, hemi atana hmalatu chief minister, chief secretary, DGP, Home department official-te leh department hrang hrang ami thawihtawp chhuahtute, YMA, tlawmngai pawl dang leh zirlai pawl te chungah lawmthu a sawi a. Mipuiin tha taka an thlawp tlatnaah leh chanchinbumiten thuchhuah puitling tak nen thudik leh belhchian dawl chauh an chhuah thin avangin lawmthu a sawi bawk.
Home secretary H. Lalengmawia’n Manipur buaina chhuah tirh – May 3 tanga Mizoram sawrkar hmalak dan hrang hrang a report a. May 7 atangin Imphal atang hian Mizoram mi lakchhuah tan an ni a, state sawrkar ruahman leh sensoa lakchhuah hi an vaiin 262 niin, zirlai an tam ber a, hna thl avanga training leh damdawi in pan bakah tul danga zinte an ni. Sawrkarin in report tura a tih anga, a tira tangkhang lakchhuah ngai zinga in report, a hnua anmahni remhriat dana lo chhuak leh si, sawrkarin thlawhna ticket a lo laksak vek tawh mi 43 an awm a, ticket hi refund theih a nih tawh loh avangin chawi thlawn a ni.
Arunachal Pradesh sawrkarin Mizoram sawrkar puihna a ngen angin, an state mi zirlai 4, Churachandpur-a tangkhang chu Mizoram kaltlangin lakchhuah sak tel an ni a, dam takin Itanagar an thleng tawh a ni.
Hetihlai hian he buaina avanga Manipur atanga Mizorama sahimna zawnga tlan lut chu May 11 tlai dar 5.00 thlenga sawrkarin a chhinchhiah chin chu mi 4409 an ni a. Saitual district-ah la tam berin 1523, Aizawl district 1427, Kolasib district 1362, Champhai district 68, Khawzawl district 15, Serchhip district 14 an ni.
Supply department chuan ratlante tan hian buhfai quintal 800 chuang a pe chhuak tawh tih a sawi a ni.
Mizoram sawrkar chuan mipui hriat tur leh zawm tur a tichhuak a. Hun reiloteah Manipur-ah internet tih nun leh a nih hmel tawh avangin Youtuber-te leh social media hmangtute fimkhur turin a chah lawk. Thu belhchian dawl lo, boruak ti muang zawng nilo, tichhe zual thei chi thehdarh lo turin an duh tih a sawi a ni.
Mizoram mi lachhuak kimah ngai Manipur atangin raltlan 4400+
