Mizoram Labour, Employment, Skill Development & Entrepreneurship minister Lalnghinglova Hmar chuan Thawhlehni khan Mumbai-ah Maharashtra Labour minister Akash Fundkar a kawm.
LESDE minister chuan Maharashtra chu state lian leh hausa, labour chungchangah pawh kalphung ngelnghet leh felfai nei a ni a, Mizoram tan zir tur engemawzat a awm tih a sawi a. State pahnihin ‘labour’ an kalpuinaa an tih dan tha lai (best practice) ve ve inzirtawn a duh tih a thlen a, thawhho dan tur an sawi dun.
Maharashtra Labour minister chuan, an state-a labour chungchang tha taka an kalpui dan zirchiang turin Mizoram sawrkar official-te a sawm a. Minister pahnih hian labour kaihhnawih bakah CSR fund-a hmalak dan pawh an sawi dun a; Mumbai sumdawnna khawvela Mizoram tana tangkai turte inhmelhriattir leh kawng kawhhmuh kawngah hma a lak tur thu Akash Fundkar hian a sawi a ni.
Sports minister ni bawk Lalnghinglova Hmar hian Tata Trusts CEO Siddharth Sharma chu Mumbai-ah hian a kawm bawk a. Aizawl-a Badminton High Performance Centre sak chungchanga thawhho dan tur an sawi dun.
High Performance Centre-ah hian court 10 awm tura ruahman a ni a, a senso zat leh a sum hmuhna tur sawi dunin, Tata Trusts hian Mizorama badminton hmunpui sakna tur a puitlin theihnan theihtawpa puih an tum tih hrilhin, kalpui zel dan sawiho leh atan dah a ni.
Mizoram minister-in Maharashtra minister-in hma lak hona tur sawi
