India rama Muaythai inelna sang ber UMAI National Muaythai Championship 2024 zawh fel takah Mizoram chuan gold medal 21, silver paruk leh bronze medal pakua, a vaiin medal 36 an dawng a, a pumpuiah pangana niin, a thlengtu Assam chu team champion an ni.
May 25-31, 2024 chhunga Tepesia, Sonapur, Guwahati, Assam-a khelh National Muaythai Championship-ah hian Mizoram chuan player 40, team official leh coach bakah referee leh judge-te nen mi 46 a tir a; tun tum hi kum 2004-a Mizorama Muaythai Association din a nih hnuah national cChampionship-a player an tirh hnem ber tum a la ni.
Mizoram team manager Lalnuntluanga chuan, “Tun tum championship-ah hian team champion nih kan tum hle a, team kan intirh len ber tum ni mah se state lian dang player 100 chuang tir an tam hle a, weight category a tam avangin overall champion nih a har hle a ni.
“Coach Lalchhuanawma hoin MTC, Edentharah thla hnih dawn inbuatsaihna kalpui a ni a, chutihlaiin phai khaw lumah kan naute’n harsatna an tawk nasa hle a, a bikin player naupang, phaia la zin ngai lo an tam avangin harsatna kan tawk nasa hle a ni.
“Kan medal lak danah kan lungawi tawk viau a, hei aia tha zawk pawha che thei erawh kan ni.
“Kan harsatna tawh kawng chi hrang hranga theihtawpa min buaipuitu Guwahati LO Dr. Saithangpuia chungah lawmthu kan sawi tak meuh meuh bawk,” a ti.
Mizoram Muaythai Team kutah medal 36
