Mahindra Maxx Pikup Mizo-ram Open Boxing Championship zawh fel a ni a, weight hrang 15-ah Serchhip boxer pasarihin gold medal an la a, Assam Rifles-in mi 30 vel lak an tum.
Championship hi Zirtawpni zan khan Serchhip Boxing Hall-ah khar a ni a, inhnek hnuhnung ber lightweight final-ah khawtual mipui tan hlawh tak, New Serchhip chhuanvawr Fredy Lalchhan-chhuaha’n harsa takin Lalruatfela (Lunglei SAI) a hneh a, split decision-in a chak.
Lightmiddleweight-ah Joseph Lalrintluanga (Serchhip Chanmari) a champion a, final-ah round thum la fai vekin Lalnunmawia (Tlang-nuam Aizawl) a hneh.
Hmeichhia lightweight final-ah inhnial theih takin K. Zairempuii (Serchhip) chuan split decision-in Rebecca Lalfakawmi (Chuhvel Mamit) a hneh ve bawk.
Ningani khan Serchhip boxer pali – Lalngaihawmi, Phoibi Malsawmtluangi leh Vanlalrinngheti bakah, Lalchhanhimate’n an khelhna weight-ah gold medal an awrh tawh a, Ngaihawmi’n hmeichhe boxer tha ber lawmman a dawng nghe nghe a ni.
Lightflyweight-ah Micky NT Beipatla (Siaha New Colony) chuan round tin la vekin Lalnun-puia (Kolasib) a hneh a, boxer tha bera thlan a ni.
Flyweight-ah K. Lalhriat-chhunga (College Veng, Aizawl) a champion a; bantamweight-ah Lalruatfela (Phainuam) chuan gold medal awrhin, featherweight-ah Nazareth Lalthazuala (Zemabawk Aizawl) hnehtu Omega Lalramdina (Dinthar Aizawl) a champion a; middleweight-ah Hriata Chhun-thang (Bethlehem Aizawl) chuan harsatna tawk lovin gold medal a dawng ve bawk.
Best boxer Beipatla leh Ngaihawmi’n trophy leh cheng singkhat ve ve an dawng a; Lunglei SAI boxer Lalruatfela leh Rebecca Lalfakawmi (Chuhvel, Mamit) hnenah final-a chak lo zinga tha ber lawmman cheng sangnga hlan a ni a; Lunglei SAI naupang H. Zonunsanga chuan promising boxer lawmman cheng sanghnih a dawng ve thung a ni.
Serchhip District Boxing Association hruaitute chuan hlawhtling taka championship zawh theih a nih avangin lawmthu an sawi a; an thawhpui 42nd Assam Rifle chuan boxer 103 tel zinga 30 vel sipaiah lak an tum tih sawiin, boxer 38-in dilna an thehlut nghal a, a hun laia lehkha thehlut hman lo tan pawh hun an hawn belh zui a ni.