Sawrkar laipui hnuaia scheme pakhat “Assistance to State & UTs for Modernisation of Police” atanga lei lirthei chi hrang hrang 219 chu nimin khan chief minister-in a vai liam a. Heng lirtheite hi Mizorama Police Station zawng zawngin an dawng vek dawn a, Outpost 15 pawhin an dawng ang a, Battalion te, Specialised Unit te leh Police Training School te pawhin an dawng dawn a ni.
Nimina lirthei vai liamna programme-ah home minister chuan thu sawiin, kan police-te thuam chak hi kan ram himna a ni a, thuam chak zel kan tum, tiin a sawi a.
Ramri buai avanga buaina chhuak thinah kan police-te thuam chak a pawimawhzia a lang thin a, chuti chung chuan duh angin kan police-te hian hmanrua leh chetvelna an nei tha thei ngai lo. Lirthei an mamawhzia hi a police te chauh lo, mipuite thleng pawh hian kan hriatpui viau tawh niin a lang.
Mizoram police-te hian lirthei an indaih lo mai pawh ni lovin, lirthei an neihchhunte pawh hi a hlui hlawm tawh avangin rikrum thila rinrawla han hman tak tak tlak a tam lo hle niin a lang.
Tuna ASUMP kaltlanga lirthei thar heti zat Mizoram Police ten an han nei thei hi a lawmawm hle a. Chutih rual erawh chuan, police thuam chakna a nih rual hian, hmanraw thar hmangtu tur kan police-te pawh an inthuam thar ve a pawimawh tih erawh a lang tel.
Mizoram Police Fitness Improvement Programme hnuaia “train to excel” tih te, “year of discipline” tih thawm hriattur a han awm ta te hi a thlamuanthlak hle a. Chumi belhchhah tura kan police-ten ‘lirthei thar’ an han dawng lehzel pawh hi fitness improvement programme nen pawh a inhmeh hle.
Chutih ruala police awm chhan pawimawh ber chu ‘mipui himna’ a ni a; a dawtah ‘ram himna’. Mipui leh ram himna tura pawimawh ‘fitness’ neih kawnga Mizoram Police inrelbawlnaa hmasawnna lo lang mek hi thil lawmawm tak a ni. Hmasawnna tur erawh a la awm zel e.
Mizoram Police leh a behbawm
