Chief minister Lalduhoma chuan Ningani khan Delhi-ah DoNER minister Jyotiraditya Scindia a kawm a. Serchhip District Hospital sak dan tur, oil palm chingtute chungchang leh Ministry of DoNER hnuaia Mizoramin pending project a neih ho an sawi.
Tunah hian DoNER ministry-ah Mizoramin a thehluh project inchiah (pending) mek 93 a awm a; heng atana sum ruahman zat chu vaibelchhe 1716 vel niin, project inchiah rei zual phei chu kum 24-a upa a ni tawh tih Jyotiraditya Scindia hian a lo hrilh. “Project inchiah rei tawh tam tak, vawiina han kalpui atana fuh tawh lo te hi project tharin rawn thlak ula, ka lo pawmsak ang che u,” a ti.
Oil palm chingtuten hlawk zawka an thar theih nan Mizoramah Samadhan Centre dah ve ni se, huan neitute mamawh tui, leitha leh link road tih that a, tuna an thar mek dan hectare khata metric ton 7 atanga 15 vel tal an thar chhoh theih dan dappui nise, an ti. Bukvanneia oil plam herna khawl chu an oil her chhuah phurhthlakna a thui tham avangin ‘hloh’ zelin an la kal nia sawi a ni a. Awmze nei zawka a kal theih nan Mizoramah refinery din law law nise thaa an hriat thu pawh an sawi a ni.
Mizoram project thehluh 93 DoNER-ah a pending
